Skip to main content

Kisitsisit kattuffiup siulittaasuata ukkatigai

SIK siulittaasuata, Jess G. Berthelsenip inuiaqatigiit sinnerlugit maajip aallaqqaataani oqalugiarnermini Inatsisartuni akisussaasuusut toqqaannartumik apeqquteqarfigai.

- Pissusiviusummi ilaatigut imaammata, sumiiffiit ilaanni suliffiuteqareerpugut sulisussaaleqiffiusunik, sumiiffiillu ilaanni sulisussaaleqineq annertoqaluni, tassalu sumiiffiit ilaanni sulisussaaleqiffiusuni illoqarfinniik allanniik suliartortoqarnianngippat imaluunniit nuuttoqarnianngippat periarfissatuaavoq avataaninngaanniik nunatsinnut nuutsitsinissaq, Jess G. Berthelsen, Nuup katersortarfiani maajip aallaaqqaataanut tunngatillugut oqarpoq. Ulloq alianaalluni seqinnareqaaq apulli aakkiartorluni, ullorli malunnartinniarlugu bussit aappalaartuaralersorneqarsimallutik.

Innuttaasut ikiliartortut

Piffissami kingullermi innuttaasut ikiliartornerat kattuffiup siulittasuata oqalugiaammini ima oqaaseqarfigaa:

- Inuiannguit taakkuusugut amerliartunngikkutta siunissami immitsinnut unammilluta sumiiffinninngaanniik arsaartuiniarsarissaagut. Aningaasaateqarnerit ajugaassapput – taamaattuaannarpormi, inatsisitigut arlaatigut aqunneqanngikkunik.

Tamanna pissutigalugu Jess G. Berthelseni ima apeqquteqaateqarpoq:

Atuaruk: Maajip aallaqqaataani Olsvigip neriorsuutaa: Erninermi sulinngiffeqarnissamut aningaasaateqarfittaassaagut

- Siunissami qanoq ineriartortinniarparput? Pisuussutigullu nuna tamaat isigalugu qanoq agguataarniarpagut?, taanna oqarpoq, Nunattalu pisuussutai annertunerpaatut aalisakkat, raajallu tikkuarlugit.

Qularnaateqanngitsoq

Aanalu qularnanngitsoq qalerallit taakkupput nuanatta avaannaani ukiuni kingullerni annertoqisumik inuussutissarsiutigineqartut, nunattalu karsianut annertuumik pilersueqataasut aammalu annertuumik sulisussanik pisariaqartitsisut. Assersuutigalugu 2030-mi Nuummi 30.000-nngorsimassagutta taava kikkut nunatta avannaani aalisakkerissappat? aalisakkerinerlu maannakkut nunatsinnut annertunerpaamik pilersuisuusoq allamimmi peqannginnatta, taava pisariaqalissaaq, assersuutigalugu Kinamiik sulisussanik pissarsinissaq. Pissusiviusortaaq aamma uaniippoq Nuummut nuttarneq taamatut ingerlaannassappat 2030-imi Nuummi inuit 21.555-nngorsimassapput, taakkualu kisitisit aamma piviusuupput. Tassa qanorluunniit kisitsisinik nikisitseqattaaraluarutta pissusiviusut taamaapput, kattuffiup siulittaasua oqarpoq.

Iliuuseqaritsi

Tassaniippullu Inatsisartugut. Taakkuuppummi Nunarput ataatsimut isigalugu qanoq ineriartortinneqassanersoq annertuumik aaliangiisussat. Naalakkersuisulli pingaarnerit marluk katersortarfimmi najuupput. Tassaasut partiit annerit marluk siulittaasuit Kim Kielsen (S) aammalu Sara Olsvig (IA).

- Isumaqarpunga immitsinnut arsaartuutiinnassanngikkutta piffissanngortoq ukiuni 30-ini tulliuttuni nunarput ataatsimut isigalugu qanoq ineriartortinneqassanersoq aaliangersaasoqarnissaa. Una pivara Nuna tamakkerlugu qinikkagut akisussaaffeqarlutik aaliangerniarlik nunarput ukiuni tulliuttuni 30-ni qanoq ineriartortinneqassanersoq, taanna ujartuilluni oqarpoq ilassuteqarlunilu:

Tapersersuineq

- Uagut Sulisitsisut Sulisartullu kattuffii malinnaajumaarpugut, aaliangigaallu naapertorlugu uagut pilersaarusiussaagut. Kikkummi allat aaliangiissagaluaramik? Jess G. Berthelsen, inersuarmi ulikkaaqqasumi, nerriuviulli qalii soorunami aappaluttuullutillu qaqortuusut, oqalugiarnermini oqarpoq.

Qulequtat sammisat ilaatigut akissarsiat minnerpaaffiata qaffanneqarnissaa taassuma sammivaa, taamaasillutik suliffissaaleqisut Danmarkimut "kammalaatiminulli" nuuttarunnaarniassammata, taanna oqarpoq:

Asissunngisaannarta

- Inoqatitsinnullu allanut upperisaq aallaavigalugu ammillu qalipaataa aallaavigalugu asissunngisaannarta, tamannami iluaqutaanngisaannartoq silarsuup oqaluttuarisaanerata takutittuarpaa, illuattungaatigulli inoqatitsinnut kikkuugaluartunulluunniit ataqqinninnermik takutitsisarta, inoqatinummi asissuineq ataqqeqatigiinnermik pilersitsinngisaannarpoq, akiniaaneq toqqissisimanermik pilersitsinngisaannarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER