Skip to main content

Maajip aallaqqaataani Olsvigip neriorsuutaa: Erninermi sulinngiffeqarnissamut aningaasaateqarfittaassaagut

Sulisartut ulluanni - maajip aallaqqaataanni - naalakkersuisoq Sara Olsvigip (IA) nalunaarutigaa, erninermi sulinngiffeqarnissamut aningaasaateqarfimmik pilersitsisoqassasoq, tamannalu suliffeqarfinni naligiinnerulernermik ilaatigut qulakkeerinnissasoq.

- Maannamut ajuusaarnaraluartumik assersuutissanik takusaqartarpugut arnat meeqqiorfimmik nalaaniittut suliffeqarfinnit tigujumaneqartanngitsut, suliffeqarfiit naartunermi erninermilu tamakkiisumik aningaasarsiaqartitsinissaannik pissuteqartumik. Maannakkut tamanna unitsinniarneqalerpoq naartusunut ernisunullu aningaasaateqarfimmik tapertaassussamik pilersitsinikkut, tassuuna qulakkeerneqassammat suliffeqarfiit aningaasarsianut aningaasartuutimik amerlanerpaartaannik naartusunut ernisunullu aningaasaateqarfimmit utertitsivigineqartalernissaat.

Sara Olsvig tusagassiuutinut nalunaarummi taama allappoq. Taassuma Isumaginninnermut, Ilaqutariinnermut, Naligiissitaanermut Inatsisinillu atuutsitsinermut Naalakkersuisoqarfik akisussaaffigaa.

Ukioq ataaseq qaangiuppat inatsisissatut siunnersuut
Erninermi sulinngiffeqarnissamut aningaasaateqarfissamut inatsisissatut siunnersuut aappaagu upernaakkut ataatsimiinnermi saqqummiunneqarnissaa taassuma naatsorsuutigaa.

- Erninermi sulinngiffeqarnissamut aningaasaateqarfik amerlasoorpassuarnit sivisuumik kissaatigineqartuarsimavoq Naalakkersuisullumi nuannaarutigaat suliffeqarnermi illuatungeriit suleqatigalugit maannakkut qanittumi anguniakkat piviusunngortinneqartussanngormata, Sara Olsvig oqarpoq, maajip aallaqqaataa immikkuullarissuusoq taanna isumaqarpoq, ''ataatsimoorluta naleqartitatsinnik naligiinnerulernissamillu sulissuteqarluta anguniakkatut sulissutigisatsinnik, ataatsimoornerulernissatsinnik nammaqatigiinnerunissatsinnillu immitsinnut eqqaasittaratta''.

Aaqqissuusseqqinneq
Naalakkersuisut ineqarnermut tapiissutit aamma meeqqanut tapiissutit iluarsaateqqinnissaat aallartikkaat, taanna ilisimatitsivoq, tamatumalu pingaartumik sulisartut aningaasarsiakinnerit akunnattunillu isertitaqartartut kiisalu ilaqutariit meerartallit iluaqutigissagaat oqaatigaa.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER