aatsitassarsiorneq
Kirkegaard taaqquallakkaluarluni suli neriuuteqarpoq
London Miningip pilersaarutai naleeruttutut nalunaarutigineqarput. - Taaqquallannarpoq, naalakkersuisuusimasoq Jens-Erik Kirkegaard oqarpoq, taannalu isumaqarpoq siumoortumik suliniutinut allanut mattussereertarianngitsugut
Nuup Kangerluani Isuani savimminissamik piiavissap piviusunngorsinnaanera maanna qularnarsivoq.
Qaammaterpassuarnimi aningaasatigut ajornartorsiuteqareerluni London Miningip aningaasaliisussaata pingaarnerup pisortatigoortumik nalunaarutigaa pilersaarut naleqanngitsoq.
- Taaqqunarpoq, kisianni taamaammat periarfissat allat mattunniunneqartariaqanngilagut imaluunniit nuna immikkoortukkaarlugu inissillugu, soorlu partiip aalajangersimasup (Inuit Ataqatigiit, aaqq.) qineqqusaarnermi matumani siunnersuutigisimagaat, inuussutissarsiornermut, aatsitassanut suliffeqarnermullu naalakkersuisuusimasoq Jens-Erik Kirkegaard Facebook-imini taama marlunngornermi allappoq, Politiken allaaserisaqareersoq nunatsinni aatsitassarsiorfissatut neriuuteqarfigineqarnerpaaq nalileerunnerarlugu.
Atuaruk: Pisortatigoortoq: London Miningip Isuani pilersaarusiaa naleeruppoq
Isumalluarpoq
Jens-Erik Kirkegaardip uani Inuit Ataqatigiit nunatta immikkuualuttunngorlugu immikkoortiterneqarsinnaaneranut oqariartuutaa innersuussutigaa. Tassa soorlu nunap immikkoortua aalajangersimasoq aalisarfiussasoq, aatsitassarsiorfiusussasoq imaluunniit nunaleriffiusussasoq.
- Ullumikkut misissueqqaarnernut akuersissutit 89-t tunniunneqarnikuupput. Kisianni uani sillimaffigisariaqarpoq taakkunannga ikittuinnaat aatsitassarsiorfinnik aallartitsisinnaanerat. Taamaammat misissueqqaarnernut akuersissutit isumaqanngillat tassa aatsitassarsiorfinnik tunniussisoqarniartoq. Silarsuarmimi pisut, nunatsinni politikerit sunniuteqarfigisinnaanngisaat, pilersaarutinut sunniuteqarsinnaapput. Soorlu Isuani pilersaarutinut taama pisoqartoq. Uanimi savimminissap akia apparpoq Ebolamillu nappaalanerup aamma suliniut sunnerpaa, Jens-Erik Kirkegaard oqarpoq.
Kisianni naalakkersuisuungallartoq isumalluarpoq.
- Suliniut naleeruttutut nalunaarutigineqarpoq. Kisianni naluarput pissutsit ukiut marluk qaangiunneranni qanoq ikkumaarnersut, Jens-Erik Kirkegaard oqarpoq.