aatsitassarsiorneq

Pisortatigoortoq: London Miningip Isuani pilersaarusiaa naleeruppoq

Nuup kangerluani Isuani saviminissamik piiaanissamik pilersaarutaagaluartoq piviusunngunngitsuussagunarpoq

Inuussutissarsiornermut aatsitassarsiornermullu naalakkersuisutut taamani atorfeqartoq Jens-Erik Kirkegaard, Siumut, aamma London Miningimi pisortaaneq Graeme Hossie Isukasiani saviminermik piiaanissamik isumaqatigiittut oktobarip 24-ani 2003-mi

London Mining qaammatini kingullerni aningaasaqarnikkut ajornartorsiortorujussuuvoq. Isuani saviminissamik piiaanissamut pilersaarutaa taamaasilluni naleeruttutut nalunaarutigineqarpoq.

Politiken allappoq.

Suliffeqarfik kukkunersiuinermik suliaqartartoq PricewaterhouseCoopersip aatsitassarsioqatigiiffik aqulerpaa oktobarimi.

London Miningip Sierra Leonemi aatsitassarsiorfia aatsitassarsiortumit Frank Timisimit tiguneqarpoq. London Miningip suleqataa London Mining Greenland suli allanit aqunneqalinngilaq.

Politiken allappoq Namminersorlutik Oqartussat Isuani pilersaarutigineqartut pisiariumaneqanngippata oqartussaaffigileqqissinnaagaat.

Pilersaarummik aallartitsisoqassanngippat Namminersorlutik Oqartussat aappaagu oqartussaaffiit tigoqqissinnaavoq.

Isukasiani piiaanissaq aallartissappat 13 milliardinik aningaasaliisoqarnissaa pisariaqartinneqartareerpoq, taakkulu saviminissarsiorfimmut atorneqassapput. Naalakkersuisullu atsioqatigiittoqareerneraniit aningaasaliisussarsiulernissaq aallartinneqarluni.

Powered by Labrador CMS