Kapisilinnut arpatsitsinissaq taamaatinneqarpoq
Nuukkap Extreme Running Race 2022, ukioq manna ukiut qulinngortorsiorluni arpatsitsinissaq, atortussat amigarmata taamaatinneqartoq, aaqqissuisut nalunaarutigaat.
Nuukkap Extreme Running Race ukioq manna ingerlanneqassanngitsoq, aaqqissuisut nalunaarput.
- Ajuusaarutigalugu nalunaarutigissavarput atortussat amigaatigineqarmata Nuukkap Extreme Running Race 2022, ukiut qulinngortorsiorlugit arpatsitsineq, aamma Kapisillit festival taamaatinneqartut. Atortussat tamakkerniarlugit ilungersorsimavugut, iluatsitsinatali, Kapisilinnut arpatsitsinissamik aaqqissuisut nalunaarput.
Nuukkap, tassa Nuummiit Kapisilinnut, arpanneq ulluni pingasuni ingerlaarneqarpoq, peqataasut asimi unnuisarlutik. Arpannerup isorartussusaa 110 km missaaniippoq.
Arpatsitsineq ukioq manna 7. julimiit 9. juli ilanngullugu ingerlanneqartussaagaluarpoq. Arpatsitsinissamulli qaammataajunnaartorlu aaqqissuisut taamaatitsinnarput.
Aqqa allanngortinneqassaaq
Aaqqissuisut ilanngullugu nalunaarutigaat aaqqissuussami timersortarfik peqataasarunnaartoq, taamaattumillu aaqqissuussaq Nuukkap Adventure Racetut ateqalerumaartoq.
- Nuukkap arlalinnit ukiut tamaasa qilanaarineqartarpoq, aaqqissuussarlu inerisarneqarluni illoqarfitsinni piuartutut aaqqissuunneqartalersimavoq. Arpatitsineq nunatsinnit aamma nunarsuup sinneranit soqutigineqarluartarpoq.
Arpatsitsineq aallarteqqaarmat arpattut 30-t missaanniissimasut maanna 130-t missaat peqataasartut, aaqqissuisut ilisimatitsipput.
Nuukkap-imisiorna arpatsitsisoqarmat Martin Møller siullersaalluni apuuppoq. Taassuma 110 km nunakkut arpalluni akunnerni 16-ningajanni ingerlaareerlugit apuuppoq.