Martin Møller siullerpaalluni Kapisilinnut apuuppoq

Martin Møller 110 kilometerit arpareerluni tallimanngormat unnukkut Kapisilinnut apuuppoq.

Qaqqaq 100 kilometerit sinnerlugit isorartutigisoq arpaffigineqarsimavoq. Ukioq manna Nuuk-Kapisillit Tour ulluni kingullerni ingerlanneqarmat peqataasut taamak isorartutigisumik arpassimapput.

Peqataasut aamma Nuummiit Kapisillit tungaanut ingerlaarnermi periarfissat assigiinngitsut akornanni sorleq atussanerlugu ukioq manna namminneerlutik aalajangersinnaasimavaat.

Inuit ilaasa ullut arlerlugit qaqqami unnuisarnissaq toqqarsimavaat - ilaasalu tallimanngornerup ullaavaniit toqqaannartumik Kapisilinnut arpannissaq toqqarsimallugu.

Ukiuunerani OL-imut peqataasimasoq Martin Møller sisamanngornerup tallimanngornerullu akornanni nal. 03.00 arpalluni aallartikkami Kapisilinnut tallimanngormat unnukkut nal. 18.34 apuuppoq.

Peqataasut marluk apuuteqqaanniuttut.

Martin Møllerip saniatigut allat sisamat toqqaannartumik arpannermut peqataasimapput.

Arfininngormat ullup-qeqqartoq ualiusorlu peqataasut sinneri ulluni pingasuni unnuisareersimallutik apuupput.

Angusat facebookikkut saqqummiunneqassasut, aaqqissuisut Sermitsiaq.AG-mut ilisimatitsipput.

Peqataasut apuukkuni, arfininngorpat unnukku Kapisillit Festivalertoqarnerani peqataanermikkut ingerlaarsimanertik nalliussisinnaavaat.
Powered by Labrador CMS