Kangilinnguit atuinnarneqarniarnera tusaatissatut tiguaat

Naalakkersuisut Kangilinnguani Sakkutooqarfiup pilerseqqinneqarnissaa itigartissagaat, Inatsisartunut ilaasortap Ineqi Kielsenip, Siumumeersup Naalakkersuisunut allakkani ammasuni kaammattuutigaa.

Tamannali piviusunngortinneqassanngilaq.

Atuaruk: Ineqi: Kangilinnguit ammaqqinneqarnissaat itigartitsissutigineqarli

- Sakkutooqarfik Kangilinnguit qimallugu nuunnissaat pillugu politikkikkut isumaqatigiissuteqartoqanngilaq, taamaattumillu aamma Sakkutooqarfiup Kangilinnguit qimallugu nuunniarunnaarnera pillugu politikkikkut isumaqatigiissuteqartoqartussaannani, Namminiilivinnermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen oqarpoq.

Saliisoqarnissaa piumasaqaatigaa

Kangilinnguilli mingutinneqarneranit saliisoqarnissaanut piumasaqaatini attatiinnarpaa.

- Kangilinnguani avatangiisini saliinissaq Illersornissamut ministereqarfiup isumagissaagaa akisussaaffigigaalu Naalakkersuisut pingaartimmassuk, Suka K. Frederiksen erseqqissaavoq.

Atuaruk: Naalakkersuisoq Danmarkimut: Kangilinnguani saliinissaq eqqaamallugu

Suliami Namminersorlutik Oqartussat akuutinneqarneranni ilisimatinneqarnerannilu periaasiusut Naalakkersuisut naammagisimanngikkaat aamma naqissuserpaa.

- Tamanna soorunami malersoqqissavarput, neriorsuivoq.