Ineqi: Kangilinnguit ammaqqinneqarnissaat itigartitsissutigineqarli

Siumup aaqqissuussaanerani siulittaasup tullia, Ineqi Kielsen, Kangilinnguit matoqqaannartariaqartoq isumaqarpoq, Naalakkersuisullu tamanna danskit naalakkersuisuinut erseqqissartariaqaraat. Naalakkersuisunut allagaqarnermini taama oqariartuuteqarpoq.

Ammaqqinneqarnissaa unitsikkusukkaa
Decembarip arfineq-pingajuanni danskit naalakkersuisuisa Socialdemokraatit, Radikale Venstre aamma Dansk Folkeparti peqatigalugit, Kangilinnguit ammaqqinneqarnissaat isumaqatigiissutigaat.

Atuaruk: Kangilinnguit siunissaa oqaluuserineqaqqittoq

Tamanna sioqqullugu pilersaarutit tusagassiutitigut saqqummiunneqartareerput. Kisianni danskit naalakkersuisuisa Kangilinnguit ammaqqinnissaanut periarfissinneqassanngitsut, Ineqi Kielsen (S) isumaqarpoq.

Akuersaaneqarsinnaanngilaq – Kangilinnguani matusineq matusineruvoq, taanna ammasumik allagaqarnermini allappoq.

Folketingimi partiit akornanni isumaqatigiissut
Ammasumik allagaqaateqarneq, § 37 naapertorlugu Naalakkersuisunut apeqquteqarneranut ilaliussaavoq.

Danskit naalakkersuisuisa aamma partiit isumaqatigiissuteqarfigineqartut akornanni isumaqatigiissut pillugu Naalakkersuisut decembarip qulingiluaanni tamanut saqqummiunneqarnerani paasitinneqarsimasut, avatangiisinut naalakkersuisoq Suka K. Frederiksen (S) akissuteqaammini allappoq.

Atuaruk: Kinamiut Kangilinnguit pisiariumagaluarpaat

Naalakkersuisut tusaatissatut tiguaat
Tamatuma saniatigut oqaatigaa, Naalakkersuisut tassunga aalajangernermut sunniuteqanngitsut.

- Sakkutooqarfiup Kangilinnguani Sakkutooqarfiup atortuinik atuisinnaatitaanera aallaavigalugu, Sakkutooqarfiup Kangilinnguani pilersitseqqinnissaq pillugu paasissutissat Naalakkersuisunit tusaatissatut tiguneqarput.

Atuaruk: Danmarkip Kalaallit Nunaat qarsupiinnarlugu aalangiuteqartoq

Kisianni taamatut aalajangerneq Naalakkersuisut tusaatissaannartut tigussanngikkaat, Ineqi Kielsen isumaqarpoq.

- Salinneqartariaqarpoq. Nutaamik sakkutooqarfilioqqinniarneq nunatta itigartilluinnartariaqarpaa, taanna allappoq.

Atuaruk: Ilisimasalik: Kinamiut aamma Amerikamiut pissaaneqarniuuttut

Ammaqqinneqarnissaanut tunuliaqutaasoq qularnartoq
Illersornissaqarfiup sakkutooqarfik ilaatigut inissiivittut atorneqarnissaanut kissaatigigaa, Kangilinnguit ammaqqinneqarnissaannut tunngaviusutut tamanut oqaatigineqarpoq. §37 naapertorlugu apeqqummut akissummi aamma Naalakkersuisut tamanna kisiat nassuiaassutigineqarsimasoq oqaatigaat.

Nittartakkakkut tusagassiorfik defencewatch.dk naapertorlugu, sakkutooqarfiusimasoq General Nice Groupip pisiarinnginnissaa piniarlugu danskit naalakkersuisui taamatut aalajangiisimapput.

Avatangiisinut naalakkersuisoqarfik Danmarkimi illersornissamut ministeriaqarfimmit juunimi 2016-imi ilisimatinneqarput, Kangilinnguit ammaqqinneqarnissaa isumaliuutigineqartoq. Mailimi tassani aamma General Nice Groupip sakkutooqarfiusimasoq pisiarissallugu soqutiginnittut allaqqavoq.

- Taama danskit naalakkersuisuisa Nunatsinni nunaminertanik Nunatsinni oqartussaasunik suleqateqanngilluinnarlutik aalajangiisarniarnissaat ernumanaqaaq, Ineq Kielsen (S) ammasumik allakkamini allappoq.

Atuaruk: Naalakkersuisoq Danmarkimut: Kangilinnguani saliinissaq eqqaamallugu

Danskit naalakkersuisuinik sakkortuumik isornartorsiueqqusoq
Kim Kielsen (S) taassumalu naalakkersuisuisa danskit naalakkersuisuinut ersarissumik oqariartuuteqartariaqartut, taanna isumaqarpoq.

- Taamaattumik allakkamik nassitsininni Naalakkersuisut kajumissaarusuppakka, naalakkersuisutta danskit naalakkersuisui sakkortuumik isorisariaqaraat. Taamatullu Nunatsinni pisoqaqqinnginnissaanik sillimajuaqqullugit, aammalu Kangilinnguani sakkutooqarfimmik pilersitsiniarneq itigarteqqullugu, Ineqi Kielsenip ammasumik allagaani tamanna allaqqavoq.

Atuaruk: Suka: Kangilinnguani saliisoqassaaq

Suka K. Frederiksenip (S) § 37-mut akissuteqarnermini erseqqissaqqippaa, Kangilinnguani pilersitseqqinnissamik pilersaaruteqaraluarpataluunniit, Naalakkersuisut Kangilinnguani avatangiisinik saleeqqissaartoqarnissaa aalajangiusimallugu.