Kalaallit Nunaanni Politiit sapaatip akunnerata naanerani ulapingaatsiarput
Snecooterip qimussit aporsimavai, inuillu sisamat imigassartorsimallutik biilertut unitsinneqarsimapput. Qaqortumilu ajutoortoqarsimavoq, inuk ajutoornermi toqusimalluni.
Kalaallit Nunaanni Politiit sapaatip akunnerata naanerani ulapputeqangaatsiaqqissimapput.
Pigaartut pisortaat oqaluttuarpoq sapaatip akunnerata naanerani assigiinngitsunik suliaqarsimallutik. Angerlarsimaffinni eqqissiviilliornerit meerartaqarfiusut meerartaqarfiunngitsullu arlallit orniguffigineqarsimapput, aammali imerniartarfinni aqqusinernilu eqqissiviilliortitsisoqarsimavoq, tillinniartoqarsimavoq naamaartoqarsimallunilu.
Nakuusertoqarsimaneranut tunngatillugu suliassat arlallit aallartinneqarputtaaq.
Julefrokostertut
Julefrokostertoqarnerata nalaani politiit immikkut inuttaliinngillat. Julefrokostertulli sumiinneri aallaavigalugit politiit sumiiffinnik ukkatarinnipput.
- Inuit sisamat imigassartorsimatillutik biilertut sapaatip akunnerata naanerani uani unitsippagut, pigaartut pisortaat, Julie Senderowitz Bendtsen Sermitsiaq.ag-mut ilisimatitsivoq.
Ajutoornerit
Ippassaq marlunnik ajutoortoqarpoq, politiit orniguffigisimasaannik.
Sisimiuni qamuteralattup qimussit ippassaq aporpai. Aquttuusoq qimussersorlu ajoqusinngillat, qimmilli marluk toqupput, qimmillu allat marluk ajoqusersimallutik.
- Qaqortumi aamma ajutoortoqarpoq, inuk inersimasoq imaanut nakkarsimagami. Pineqartoq toquvoq. Politiit misissuereernerminni inerniliussaraat pisoq ajutoornerusimasoq. Qanigisaasut ilisimatinneqareerput, pigaartut pisortaat oqaluttuarpoq.
Imminut toqunnissamik siorasaarisut
Kalaallit Nunaanni Politiit imminut toqunnissamik siorasaarisunut arlalinnut aamma orniguttariaqarsimapput. Pigaartut pisortaat ilisimatitsivoq nalliuttut qanillinerani imminut toqunnissamik siorasaarisut amerlasarneri takornartaanngitsoq.
- Politiit innuttaasunut kaammattuuteqarumapput inuit kiserliorsinnaasut immikkut sianigineroqqullugit. Juulli tamatigut nuannersuinnaasanngilaq. Taamaattumik kaammattuerusuppunga inuit kiserliorsinnaasut nikallungassuteqarsinnaasullu ilalersornissaannut eqqumaffiginnittoqassasoq, kiserliortummi juullip tungaanut kisimiittutut misiginnginneruniassammata, Julie Senderowitz Bendtsen Sermitsiaq.ag-mut oqarpoq.