Kalaallit atuakkiaat siuarsarniarlugit isumasioqatigiissitsisoqassaaq
Nunatta Atuakkialerinernut Allaffiata atuakkanik saqqummersitsisarfiit, Nunatta Atuagaateqarfia, atuagaarniarfik allallu novemberip 7-ani isumaqatigiissitsissavai.
Kalaallit atuakkiaannik atuarusussuseq annikilliartorpoq.
Nunatta Atuakkialerinernut Allaffia - GreenLit - taama ingerlasoqarneranik allannguisussatut suliakkerneqarpoq.
GreenLit Nuummi 7. november isumasioqatigiissitsissaaq, tassani peqataassallutik nunatsinni atuakkanik saqqummersitsiviit, atuagaarniarfik Atuagkat, Nunatta Atuagaateqarfia allallu susassaqartut.
Isumasioqatigiissitsinermi apeqqutit akineqarniartussat tassaapput kalaallisut atuakkanik saqqummersitsisarfiit sunik unammilligassaqarnersut, qanorlu iliortoqarsinnaanersoq pitsanngorsaavigineqarnissaannut.
- Sammineqartussat allat ilagaat atuakkanik saqqummersitsisarnermi misilittakkat, unammilligassallu assigiinngitsut, aamma atuakkiortumut aaqqissuisoqartarneq, ilulisilersuisarneq assitalersuisarnerlu, grafikkerinik naqiterivinnillu suleqateqartarneq, minnerunngitsumillu atuakkanik pisiassanik sinerissamut illoqarfinnut nunaqarfinnullu siammarterisarnermi aporfiusartut assigiinngitsut, GreenLit tusagassiorfinnut nalunaaruteqarluni allappoq.
Atuartartut ikiliartorput
Kalaallit atuakkiaasa pitsaanerulernissaannut GreenLit aqqutissiuusseqataasussaavoq. Taamaammat atuakkiortunngorusussuseqartut atuakkiortullu pikkorissartarniarlugit suliaqartarpoq.
Kalaallit Atuakkiortunit iminneqarluni HS analyse misissuimmat paasinarsivoq aperineqartunit 35 procentii ukiup ataatsip ingerlanerani atuakkamik kalaallisuumik atuarsimanngitsut.
- Tamatuma killormut saatinnissaa KA-ip GreenLit – Nunatta Atuakkialerinermut
Allaffeqarfia – aqqutigalugu, suliassami ilaatut tiguaa.
- Isumasioqatigiinnermi saqqummiussuunneqartut atorlugit GreenLit-ip ukiuni tullerni suliniutissaasa pingaarnersiorneqarnissaat, KA-mi suliarineqassaaq. GreenLitsittaaq suliassarisussaava atuakkiat kalaallisuut, oqaatsinut allanut nutserneqarlutik, nunani allani soqutigineqarnerulernissaannut aqqutissiuussinissaq, GreenLit ilisimatitsivoq.