Nalunaarusiaq: Kalaallisut atuakkanik atuartartut ikiliartorput

Kalaallit atuakkanik kalaallisuunik atuarumatussusaat pillugu nalunaarusiaq immaqa nikalluallannarsinnaavoq.

Kalaallit atuakkiaannik atuarusussuseq annikilliartorpoq. Kalaallillu kalaallisut atuarnermut sapinngisatik, 2007-imi misissuinermut sanilliullugu, maanna appasinnerusutut nalilerpaat.

HS Analysep, Kalaallit Atuakkiortut sinnerlugit misissuinera taama inerniliussaqarpoq.

Atuartartoq ilisaritillugu

Misissuinermi inut 709-t, 18-inik ukioqalereersimasut nunatsinnilu sumiiffinni assigiinngitsuni najugaqartut peqataapput. Kalaallisut atuakkat pineqarmata, peqataasut tamarmik kalaallisut oqaluttuupput, misissuinerlu martsip qiteqqunneranit aprilip qiteqqunneranut 2020-mi ingerlanneqarluni.

Misissuineq naapertorlugu atuakkanik kalaallisuunik atuartartuni amerlanerpaapput arnat sivisuumik ilinniarsimasut Nuummilu najugaqartut. Atuakkanilli kalaallisuunik atuarneq soqutigineerukkiartorpoq:

- Kalaallisut atuakkianik soqutiginninneq atuarusussuserlu annikilliartorpoq, aamma nunaqarfinni avinngarumasunilu, kalaallisut ulluinnarni oqaluffiusuni, Kalaallit Atuakkiortut, KA-mi siulittaasoq, Juaaka Lyberth nalunaaruteqarpoq.

709--ni peqataasuni 26 procentit misissuinerup nalaani kalaallisut atuakkamik atuarput. 35 procentiili ukiup ataatsip kingulliup ingerlanerani kalaallisut atuakkamik atuarsimanngillat.

Qiiaamminartut eqqaamasallu

Kalaallit Atuakkiortut atuakkat kalaallisoortut pitsaanerulersikkusuppaat. Taamaammat misissuisoqarpoq.

Kalaallillu atuakkiortut qiiaamminartunik eqqaamasalersaarutinilluunnit atuakkiortut soqutigineqarnerussagunarput. Sammisammi taakku kalaallinit atuarneqarnerupput.

- Atuakkat kalaallisoortut eqqaamasalersaarutit soqutigineqarluarput. Peqataasut 37 procentiisa atuakkat taakku pillugit "soqutigilluinnarpara" toqqarpaat, 18 procentiisalu "soqutigaara" toqqarlugum misissuinermi allassimavoq.

Misissuinermi akissuteqartut 40 procentiisa qiiaamminartut aliortualersaarutillu kalaallisoortut "soqutigilluinnarlugit" nalunaaruteqarput. Taakkunannga inuusunnerusut, 40-t ataallugit ukioqartut, soqutiginninnerpaallutik.

Sulissapput

- Misissuinerup ersarilluinnartumik takutippaa atuakkat kalaallisoortut soqutigineqalernissaannut nunanillu allanit ilisimaneqaenerulernissaannut, suliassaqangaatsiartugut, Juaaka Lyberth tusagassiorfinnut nalunaaruteqarluni allappoq.

Kalaallit Atuakkiortut 2020-mut aningaasanut inatsimmit 700.000 koruuninik aningaasaliiffigineqartussanngorsimapput. Aningaasat Kalaallit Atuakkiat pillugit allaffimmik pilersitsinissamut atortussaapput, kalaallillu kalaallisuunik atuarusussuseqarnerulernissaannut suliniuteqarfiussalluni.

Aningaasalli suli tiguneqarsimanngillat, KA-llu kontoanut juulip aallaqqaataani nakkassallutik, Kalaallit Atuakkiortut, KA, ilisimatitsivoq.

Nalunaarusiap imaa Kalaallit Atuakkiortullu pillugit allaaserisat arlallit aviisimi Sermitsiami saqqummersussami atuarsinnaavatit.