Innarluutillit najugaanni Ivaaqqami kinguaassiutitigut atornerluisoqarsimaneranik pasitsaassisoqarneranik Qaqortumi politiinut saaffiginnittoqarpoq sapaatit akunneri pingasut matuma siorna.

Nalunaarut arnamut 23-nik ukiulimmut tunngassuteqarpoq, taanna sulisut qanigisaasullu ilisimanngisaannik naartulersimavoq kingornatigullu ernilluni. Qaqortumi politiit suliaq pillugu paasiniaaleruttorput.

Immikkoortortaqarfimmi pisortaq Søren Hansen

Paninnguaq Steenholdt

- Suliaq pillugu misissuileruttorpugut. Allanik paasissutissanik oqaaseqarsinnaanngikkallarpunga, taamaallaat oqaatigisinnaavara suliaq pillugu misissuileruttoratta, immikkoortortaqarfimmi pisortaq Søren Hansen oqarpoq. 

Innarlerneqarsimasoq nammineerluni innarliisimasup kinaaneranik oqaaseqarsinnaanngippat DNA uppernarsaatitut pingaaruteqartuussasoq pinerluttoqarsimatillugu misissuisartoq suliaq pillugu Sermitsiaq.AG-p oqaloqatiginikuuaa.

Suliamut pasisaqartoqarnersoq Søren Hansen oqaaseqarsinnaanngilaq.

Suliaq naatsunngorlugu

Nittartakkatigut inuit naapittarfiitigut siammarterisoqalerpoq, inuppassuarnit qisuariarfigineqarluni. Annertuumik innarluutilik pineqarpoq, taanna septembarip aappaani 2022-mi ernertaarpoq. Pineqartup naartunera Ivaaqqami sulisunit imaluunniit qanigisaanit ilisimaneqarsimanngilaq.

LÆS OGSÅ: Pinerluttoqarsimatillugu misissuisartoq Ivaaqqami suliaq pillugu: DNA-mik misissugassamik kikkut tamarmik tigusiffigineqarsinnaanngillat

Arnaq annertuumik innarluuteqarpoq, angerlarsimaffimmi sulisunit sullinneqarnissamik pisariaqartitsilluni. Pineqartoq oqalussinnaanngilaq pisussinnaananilu, taamaammallu atoqateqarnissamut akuersisimannginnissaa naatsorsuutigineqartariaqarluni.