meeqqat inuusuttullu
Isumaginninnermut sulianut meeqqanik peqataatitsineq pillugu ataatsimiinneq
Meeqqat pisinnaatitaaffii pillugit suliniaqatigiiffik MIO aamma Peqatigiiffik Kalaallit Meerartaallu ataatsimiinnermik aaqqissuisuupput
Sulisut pisortallu 80-it sinnillit meeqqanut ilaqutariinnullu suliaqartuneersut, illoqarfinniit nunalu tamakkerlugu aalajangiisartut atorfilittallu MIO’p Peqatigiiffik Kalaallit Meerartaallu ataatsimiisitsinissaannut 'Meeqqanik peqataatitsineq – qanoq iliussavarput?' novembarip qulingani Nuummi katersuutissapput.
Ataatsimiinneq isumaginninnermut, ilaqutariinnermut, naligiissitaanermut inatsisinillu atortitsinermut naalakkersuisumit, Inuit Ataqatigiinnersumit Sara Olsvigimit ammarneqassaaq.
Atuaruk: MIO-p nersornaasiuttagaanut innersuussigit
Soqutiginninneq annertooq
Soqutiginninneq annertusimaqaaq, tamannalu meeqqat illersuisuata Aviâja Egede Lyngep, ataatsimiinnermik aaqqissueqataasup tupaallaatiginngilaa.
- Misigaara maannakkorpiaq isiginiarneqartoq meeqqat innuttaammata tusarneqarnissaminnut peqataatinneqarnissaminnullu pisinnaatitaaffillit, amerlasuullu peqataarusuttorujussuupput meerartatsinnut, minnerunngitsumik navianartorsiortunut, pitsaanerpaanik aaqqeeqataarusullutik, peqqutit assigiinngitsut pissutigalugit kommunimi Inunnik Isumaginninnikkut suliassanngorsimasunut, meeqqat illersuisuat oqarpoq.
Atuaruk: Meeqqanut atugarliortunut Nuummi katsorsaavik
Ilisimasanik katersiniartut
Meeqqanik namminneq inunnik isumaginninnikkut tunngatillugu suliassanngortinneqarsimasunut peqataatitsineq MIO-mut Peqatigiiffik Kalaallit Meerartaallu qitiusumik suliassaavoq. Ilaatigut Najorti ataatsimoorussamik suliniutaavoq meeqqap nipaanik sakkortusaasussaq peqataatitsisussarlu meeqqap ukiui inerisimaneralu naapertorlugit.
Generalsekretær Puk Draiby, tusagassiuutinut nalunaarummi oqarpoq, ikorfartuinermik aaqqissuussaq Najorti sakkuusoq, meeqqap isaaniit aallaavilimmik akuutitsinermik periusaalluni, tassani meeqqamut aaqqiissutit pitsaanerpaat qulakkeerniarlugit.
- Kisiannili suliniuteqartoqarpoq nukinnillu atuisoqarluni amerlasuunik assigiinnik tunaartaqartuni meeqqallu nipaanik nukittorsaanissamik kissaateqartunik. Ataatsimiinneq ataatsimoorfiuvoq pineqartumut tunngasunik nalunngeriikkanik katersuiffigisinnaasarput, neriunarporlu suli maanna sulinitsinnit pitsaanerusumik sulinissaq anguniarlugu isummersoqatigiissinnaassasugut, Puk Draiby oqarpoq.
Ataatsimiinneq aqagu sisamanngornermi Nuummi Katuami pissaaq.
Atuaruk: Meeqqat pillugit inatsisip meeqqat pisinnaatitaaffii qulakkiissavai