Islandimit kajumissaarut: Atuarfinni tamani meeqqat qanoq innersut misissorsigit

Eqqoriaanermut ilimagisaqarnermulluunniit tunnganngilaq, kisianni ilisimanninnermut tunngavoq. Islandip inuusuttut akornanni imigassartornermut, pujortarnermut aanngajaarniutinillu atuinermut iliuuseqarnermut tamanna aallaaviusimavoq.

Iliuuseqarneq ukiut 20-t matuma siorna aallartippoq. Taamani inuusuttut Reykjavikimi aalakoorlutik angalaartarput, toraagaqarluni iliuuseqartoqartariaqarnera paasinarpoq.

Sumiiffinni misissuinerit
Ippassaq oqaluttuareriikkatsitut inuusuttut 15-t aamma 16-t akornanni ukiullit, qaammatip kingulliup ingerlanerani imigassartorsimasut taamanernit 42 procentimik 5 procentimut appariarsimapput.

Atuaruk: Ukiuni 20-ni suliniut: Inussuttut ernguttarneri Islandip iliuuseqarfingilluarsimavai

Islandimi atuarfinni tamani meeqqat qanoq innerannik misissuineq tunngaviunikuuvoq.

- Meeqqat qanoq atugaqarnersut sumiiffinni misissuinerit pisariaqarluinnarput, Jón Sigfússon nassuiaavoq, taanna Islandimiut suliniutaanni, 'Planet Youth'-imik taaguutilimmi pisortaavoqm taannalu Reykjavikimi universitetimut attuumassuteqarpoq.

Vestnordisk Rådimi generalsekretærip Inga Dóra Markusseniå Islandimi aamma Nunatsinni inuiaqatigiit ilisimasaqarfigilluarpai. Uani sapaatip-akunnerani ataasinngornermi marlunngornermilu Planet Youthimi workshopeqataavoq. Taassumalu Nunatsinnut kajumissaarutaa ersarippoq.

- Misissuinerit tamakku aallartinneqaannassapput, tassanilu qanoq aallartittoqarnissaanik erseqqinnerulersitseriissaaq, taanna Sermitsiaq.AG-mut oqarpoq.

Sunngiffimmi sammisassarpassuit
Islandimi misissuinerit inuusuttut imigassamik cigaretsinillu atuinerannut kisimi samminngilaq, inuusuttut inuunerannut tamanut tunngasunik apersuisoqarpoq.

- Ajornartorsiutaalersinnaasut paasiniarneqarnissaannut tunngassuteqarpoq, Jón Sigfússon Sermitsiaq.AG-mut nassuiaavoq.

- Assersuutigalugu inuusuttut unnukkut aneertarunik imaluunniit atugarliorunik, taava pingaarluinnarpoq taakku paasissutissat pissarsiarinissaat, sumiiffiit tamarmik qanoq iliuuseqarnissartik nalunnginniassammassuk.

Tassami 'Islandimiut periusiannik' ataatsimik peqanngilaq. Misissuereernermi inuiaqatigiinni sumiiffinniittut assigiinngitsut ataatsimoorput. Timersoqatigiiffiit, fritidsklubbit, atuarfiit aamma inunnik isumaginnittut ataatsimoorlutik navianartorsiorfiusinnaasut qanorpiaq iliuuseqarfigissanerlugit nassaarfigaat.

Tamanna ukiut 20-t ingerlanerini Islandimi sunngiffimmi sammisassarpassuarnik pilersitsiffiuvoq. Inga Dóra Markussenip taamani ilaquttanilu Islandimut nuukkamik neqerooruterpassuit tupaallaatigai.

- Angajoqqaat unnukkut aggersarneqarpugut, tassani sunngiffimmi sammisassarpassuarnut saqqummiussiffigineqarpugut. Issiavimminngaanniik nivingajappungaluunniit, taanna oqarpoq.

- Meeqqat qaqugukkut angerlartarnissaat klassimi isumaqatigiissutigineqarli
Islandimi suliniuteqarnermi pingaarutillit ilagaat 'aneeqqusaannginnermik' eqqussisoqarnera, inuusuttut 17-it inorlugit ukiullit kisimiillutik nalunaaqutaq 22 (aasakkut nalunaaqutaq 24) aneeqqusaannginnerat. Aallaqqaammut inuusuttut kisimiittut politiinit aamma angajoqqaanik kajumissutsimik suliaqartunit unitsinneqartarput. Kisianni maanna inuusuttut ulluinnarni illoqarfimmiittannginnerat ulluinnarsiutaalersimavoq.

Inga Dóra Markussenip Nunatsinni malittarisassamik taamaattumik atuutsitsilerneq iluaqutaanissaat upperinngilaa. Taarsiullugu naqqaniik aallartittoqarnissaa siunnersuutigaa.

- Meeqqat 1. klassimi aallartippata angajoqqaat assersuutigalugu issiaqatigiissinnaapput, taamaalillutik qanoq ingerlasoqarnissaanik maleruagassanik isumaqatigiissuteqarlutik. Ilaatigut meeqqat unnukkut qassinut angerlareersimasarnissaat.

Siunnersuutit pitsaasut pingasut
Islandip præsidenterisimasaa Ólafur Ragnar Grímsson Planet Youthimut illersuisuuvoq. Taassuma Islandimi iluatsittoq siunnersuutinik ukuninnga pingasunik eqikkarpaa:

• Angajoqqaat ullormut meeqqatik akunneq ataaseq atortassavaat
• Meeqqat sunngiffimmi sammisaqartarnermut minnerpaamik ataatsimik peqataaffeqartassapput
• Inuusuttut 18-iliitinnatik imigassartornaveersaartassapput

Inga Dóra Markussen ilaquttanilu ukiumi nutaami Nunatsinnut angerlassapput. Islandimi ileqqut pitsaasut angerlaannissaat aalajangiusimalluinnarpaat.

- Meeqqat unnukkut angerlarsimasarnissaat aalajangiusimanissaa isumaqatigiissutigaarput, taamaalilluta piffissaqarfigalugit ilagisarniassagatsigit, taanna oqarpoq.