qilalugaq qaqortaq
Narsami pisarineqartoq qaqutigoortoq
Qilalugaq qaqortaq qaqutiguinnaq Kujataata imartaani takuneqartartoq, ippassaq ataasinngornermi pisarineqarpoq
Narsami ataasinngornermi ulloqeqqata-tungaani tusatsiakkat ilagaat, illoqarfiup avataani kangerlummi qilalukkanik qaqortanik arlalinnik takunnittoqarsimasoq.
Aallaallugu toqunneqartoq
Illoqarfimmiullu piniartuisa sumiiffimmut ornigunnerminni paasilersimavaat qilalugaq ataasiinnaasoq.
Qilalugaq piffissami sivisulaami malersorneqareerluni aallammik toqunneqarpoq kingornalu aalisartut piniartullu umiatsiaararsortut umiatsialivigisartagaannut – Akilliit – qaqeriarlugu pilanneqarpoq.
Illoqarfiup innuttaasui amerlasuut qilalukkap pilanneqarnera takornariartorpaat, ilaallu qilalukkap neqaanik mattaanillu nutaanik pisiniarsimassapput.
Neqaata agguarneqarnera
Qilalukkap neqaa tunineqassanersoq kalaaliaqqaniluunniit tuniniarneqassanersoq pillugu, piniartut oqaatigaat piniartup nammineq aalajagingassarigaa. Qilalugaq qaqortaq pisarineqartoq angingaluartoq malersuinermi umiatsiaaqqat qulit peqataasimapput, qilalukkallu agguarneqarnerata kingorna, umiatsiaaqqap neqi qanoq annertutigisoq pissarsiarisinnaanera killeqarpoq.
Narsami qilalukkanik qaqortanik piniarneq naliginnaasumik ukiut arlalikkuutaarlugit pisaraluarpoq, ukioq mannalu aappaassaa pisaqartoqarpoq, juunimmi qaammataata aallartilaarnerani allamik aamma pisaqartoqarpoq.