Isiginnaagassianik takutitsinerit: Kalaallit Nunaat pillugu isiginnaagassarpassuaqassaaq
Piviusulersaarutit Kalaallit Nunaanni immiunneqarsimasut, isiginnaagassiallu Kalaallit Nunaannut tunngasut arlallit Nordatlantiske Filmdageni (Nunat Avannarliit pillugit isiginnaagassianik takutitsinerni, aaqq.) ulluni 5.-15. marts ingerlanneqartussami takutinneqassapput.
Piviusulersaarusiat isiginnaagassiallu katillugit qulit, nunatsinni immiunneqarsimasut imaluunniit nunatsinnut tunngasumik sammisaqartut, Nordatlantiske Filmdageni takutinneqassapput.
Kalaallit Nunaannut tunngasunik isiginnaagassat saniatigut isiginnaagassiat Savalimmiuneersut Islandimeersullu takutinneqassapput, taamatullu saqqummiisoqarlunilu, oqallittoqarlunilu kiisalu isiginnaagassianik ilitsersuisunik pulaartoqartassalluni.
Københavnimi Nordatlantens Brygge isiginnaagassianik takutitsissaaq ulluni martsip tallimaanniit 15-at ilanngullugu.
Takutinneqartussat ilagaat piviusulersaarusiaq ’Pilluarneq ersigiunnaarpara’. Piviusulersaarusiami inuit marluk, meeraanerminni kinguaassiutitigut atornerlunneqarsimasut malinnaavigineqarput.
- Kinguaassiutitigut innarliisarnermik ajornartorsiuteqarnerup oqallisigineqarnerunissaa pingaaruteqarpoq, minnerunngitsumillu qanoq oqaluuserineqarnissaa pingaaruteqarluni, Nivi Pedersen filmimi ilitsersuisoq, filmip saqqummersinnginnerani oqarpoq.
Piviusulersaarusiap saniatigut isiginnaagassiat nunat tamalaat akornanni takutinneqartussanngorlugit, Kalaallit Nunaanni suliarineqarsimasut pingasut aamma takutinneqassapput.
Isiginnaagassiat uku, Kalaallit Nunaanni suliarineqarsimasut takutinneqassapput:
- Krudt og kærlighed
- Palos brudefærd
- The Last Ice Hunters
- Lykken skræmmer mig ikke længere
- Håbets Ø
- Grønland på film
- S.O.S Isbjerg
Kalaallit Nunaat pillugu isiginnaagassiat uku takutinneqassapput:
- Aquarela
- Das Eskimobaby
- Last days of the Arctic
Kalaallit Nunaat tyskisut
Ukioq manna pingaarnertut sammisaq tassaavoq tyskinut attavik, Goethe-Institut Dänemark suleqatigalugu aaqqissuunneqarluni.
- Tyskinut attaveqarneq ukioq manna pingaarnertut sammisami isiginiassavarput, tamannalu isiginnaagassiani nutaanerusuni qangarnisanilu takutitassatsinni maluginiarneqarsinnaavoq, Nordatlantens Bryggep nittartagaani allassimavoq.
Isiginnaagassiat piviusulersaarutillu isiginnaarneqarsinnaasut nittartakkami atuarneqarnerusinnaapput.