Filmi nutaaq: Pilluarneq ersigiunnaarpara

Pilluarneq Ersigiunnaarpara. Filmi piviusulersaarut sisamanngorpat takuteqqaarneqartussaq taamatut taaguuteqarlunilu oqariartuuteqarpoq.

Filmimi inuit marluk meeraanerminni kinguaassiuutitigut innarlerneqarsimasut, Gukki Nuka Kornelia Benjaminsenilu malinnaaffigineqarput.

- Kinguaassiuutitigut innarliisarnermik ajornartorsiuteqarnerup oqallisigineqarnerunissaa pingaaruteqarpoq, minnerunngitsumillu qanoq oqaluuserineqarnissaa pingaaruteqarluni, Nivi Pedersen filmimi ilitsersuisoq oqarpoq.

Kornelia Benjaminsenip 24-nik ukiullip Kujataaneersup kinguaassiuutitigut innarlerneqarsimanerminik kingunerlutsitsinini suli qaanginngilaa.

- Kinguaassiuutitigut atornerlunneqarnikuungama imminut suliarisimavunga. Toqqissisimasumimmi inuuneqarusuppunga, Kornelia filmimi oqarpoq.

- Arnaavoq inuusuttoq nukittooq, sorusunnerminik takutitsisartoq - aamma artornaraluarpalluunniit, Nivi Pedersen nassuiaavoq.

Pilluarneq Ersigiunnaarpara Trailer from Nivaara Films on Video.

Innarlerneqarsimanermit kingunerlutsitsinerit Korneliap inuunerani initungaluaqisut, qaangeriartorsinnaalersimavai qaamanerusumillu siunissaqarnini takusinnaalersimallugu. Innarliisimasup iliuusaanit kingunerlutsitsinerminit tarnip pissusaanik ilisimasalimmit ikiorserneqarsimavoq.

- Korneliap tarnip pissusaanik ilisimasalimmit ikiorserneqartarnerup oqallisigineqarnerunissaa angorusuppaa. Taassuma imminut suliariniarluni ikorneqarnissamik pisariaqartitsinermi ikioqquneq kanngunartuunnginnerarpaa, Nivi Pedersen oqarpoq.

'Pilluarneq Ersigiunnaarpara' kinguaassiuutitigut innarliisarnermik akiuiniarnermut, Killiliisamut atatillugu suliaavoq. Aqangu sisamaanngorpat Nuummi Katuami takuteqqaarneqassaaq, sapaatillu akunnerini tulliuttuni Ilulissani, Aasianni, Maniitsumi, Narsami Tasiilamilu takutinneqassalluni.

- Neriuutigineqarpoq, innarlerneqarsimasut imaluunniit innarlerneqarsimanerminni qaangiisimasut filmimik pineqartumik isiginnaarnerminni inunnut taakkununnga marluusunut tarrarsorumaartut aamma nukissaminnik tunineqarlutillu neriuuteqalerumaartut, ilitsersuisoq oqarpoq.

Inuttut oqaluttuarineqartut saniatigut angalasartuni tarnip pissusaanik ilisimasallit ataqatigiinnerusumik saqqummiussitillugit apersorneqarput.

- Aamma neriuutigaara, paasissutissat tunngaviginerullugit kinguaassiuutitigut innarliisarnerit oqallisigineqarnissaannut filmi tapersiissasoq, Nivi Pedersen naggasiivoq.