Iperagaasoq Skagenimi toqutsinermi suli pasineqartoq

Angummik 20-nik ukiulimmik Skagenimi toqutsisimasutut pasisatut inuit pingasut suli tigummigallarneqarlutik paarnaarussaaqqapput.

Angut 19-inik ukiulik ullut pingasut tigummigallarneqareerluni tallimanngormat iperagaavoq.

- Tassunga pasinninnerput suli attapparput, Jyllandip avannaani politiit pisortaata tullia Frank Olsen Sermitsiaq.AG-mut oqarpoq.

Pissutaasoq oqaatigineqarumanngitsoq
Politiit tigummigallarneqartussanngortitsinnginnerat uppernarsaatit naammanngitsutut nalilersimanerannik pissuteqarpoq.

Pasinninnermik attassiinnarneq suliani taama ittuni nalinginnaasupajaatut pisarpoq, tassa pasineqanngivikkuni taama pineqarsinnaanani.

Toqutsinermut suna pissutaanersoq politiit suli oqaatigerusunngilaat.

Atuaruk: Angut kalaaleq inuusuttoq Skagenimi toqutaasoq

Aanngajaarniutit pillugit aaqqiagiinngineq pineqartoq, Nordjyske.dk allappoq. Kisianni paasissutissaq tamanna toqqaanartumik apeqqutigineqarnerani, Frank Olsen ima oqarpoq:

- Tunngaviusumik inatsit naapertorlugu killisiuineq matoqqasumik ingerlanneqarmat tamanna oqaaseqarfigisinnaatitaanngilara.

Takunnittunut sioorasaarineq
Angut takunnittunut sioorasaarinermut unnerluunneqarluni arfininngormat eqqartuussisumut sassartinneqarmat suliaq allamut sangutinnertaqalerpoq. Aalborgimili eqqartuussiviup iperarneqarnissaa aalajangerpaa.

Unnerluussisussaatitaasut iperagaanera suliareqqinneqartussanngorpaat, kisianni eqqartuussivimmit suliassanngortitseqqiineq pillugu suli tusagaqartoqanngitsoq, Frank Olsen oqarpoq.

Sakkortuumik naalliutsitsineq
Angut 20-nik ukiulik inissiami januaarip 16-anni saassunneqarpoq, tassani tunumigut arlaleriarluni savimmik kapineqarpoq aammalu niaqqumi saargatigut innarlerneqarluni, kiinaanilu saarngit napineqarlutik.

Anersaartuuserlugu sinilersinneqarpoq, kisianni pingasunngornermi unnukkut Aalborgip napparsimmaviani toquvoq.

Tigummigallarneqartut angutit pingasut Skagenimeersut 27-nik, 28-nik aamma 41-nik ukioqarput.