Danmark

Angut kalaaleq inuusuttoq Skagenimi toqutaasoq

Pinerluuteqartut arlallit ataasinngornermi unnukkut Skagenimi inissiami peqqarniitsumik saassummassuk, angut 20-nik ukiulik pingasunngornermi unnukkut ikiligaanerminik toqquteqarpoq

Pinerluuteqartut arlallit ataasinngornermi unnukkut Skagenimi inissiami peqqarniitsumik saassummassuk, angut 20-nik ukiulik pingasunngornermi unnukkut ikiligaanerminik toqquteqarpoq

Aanngajaarniutit pillugit aaqqiagiinngissuteqarneq pissutigalugu peqqarniitsumik saassussisoqarnerani ilimagineqartumi angut inuusuttoq toqunneqarpoq.

Angutip 20-nik ukiullip Kalaallit Nunaanneersup naalliutsinneqarneqara Skagenimi najugaani ataasinngornermi unnukkut sapaatip akunnerani kingullermi pivoq, ikiligaanerilu annertungaarmata pingasunngornermi toquvoq.

Ritzau aamma Nordsjyske.dk taama allapput.

Angut taanna annertuumik ikilerneqarsimasoq ataasinngornermi unnukkut Skagavejimi Skagenimi iniminiittoq nassaarineqarpoq. Pinerluttuliornermut eqqugaasoq aanaarujussuarpoq, unnerluussullu naapertorlugu niaqqumi saarngatigut pingasunik putusimavoq, kiinaanilu saanii napisimallutik.

Tamatuma saniatigut savimmik aamma qiuutinik tunukkut kapineqarsimavoq.

Ataasinngornermi marlunngornermilu suliamut atatillugu angutit arfinillit tigusaraat.

Taakkunannga sisamat Hjørringimi eqqartuussivimmi inatsit tunngaviusoq naapertorlugu killisiorneqarput. Toqutseriartutut unnerluunneqaraluarput. Tamannalu maanna allanngortinneqarpoq.

- Unnerluussut ullumikkut allanngortipparput, angutit maanna toqutsisimasutut unnerluunneqarput, Frank Olsen oqarpoq.

Marlunngornermi inatsit tunngaviusoq naapertorlugu killisiuinermi unnerluunneqartut sapaatip akunnerini sisamani tigummigallarneqartussanngortinneqarput, sisamaatalu ulluni pingasuni paarnaarussaanini attatiinnarpaa.

Angutit taakku sisamat inatsit tunngaviusoq naapertorlugu killisiorneqartut tamarmik Skagenimeersuupput.

Taakkulu pinngitsuunerarput. Taamatut peqqarniitsumik toqutsinermut suna pissutaanersoq suli ilisimaneqanngilaq.

Killisiuinermili matut matuneqannginnerini aanngajaarniutit pineqarsinnaasut saqqummerpoq.

Powered by Labrador CMS