inuusuttut inatsisartui
Inuusuttut Inatsisartui aallarteqqinnissaminnut piareerput
Inuusuttut Inatsisartui 35-nik, 18-iniik 24-vit tungaanut ukiulinnik peqataasoqartussat, inuusuttut suliffissaaleqisarnerat eqqartorlugu ataatsimiillutik aallartissapput
Inuusuttut 35-vit, 18-iniik 24-vit tungaanut ukiullit, sisamanngornermiit sapaat ilanngullugu Inatsisartut ataatsimiittarfianni Inuusuttut Inatsisartui 2015 ingerlanneqalerpat peqataanissaminnut piareerput.
Inuusuttut ukioq manna ataatsimiilerunik ’Inuusuttut akornanni suliffissaaleqineq: inuusuttut suliffissaqannginnerannik ajornartorsiut annertusiartortoq qanoq iliuuseqarfigisinnaavarput?’ oqallisigissavaat.
Inatsisartut Allattoqarfiat taama tusagassiuutinut nalunaaruteqarluni ilisimatitsivoq.
Atuaruk: Inuusuttut Inatsisartuinut peqataasussat ujartorneqartut
KNR-kkut toqqaannartumik aallakaatitsisoqassaaq
Inuusuttut ataatsimiisinneqalerunik Inatsisartut oqartussaaqataanerlu pillugit tunngaviusumik ilisimasassanik tuniorarneqassapput, kingornalu inuusuttut akornanni suliffissaaleqineq pillugu oqallikkumaarlutik.
Inuusuttut Inatsisartuisa Inatsisartut ataatsimiittarfianni ataatsimiinnerat sapaatiuppat nalunaaqutaq 13.00 KNR-ikkut toqqaannartumik aallakaatinneqassaaq.
Inuusuttut Inatsisartui 2015-imi naammassigunik pisarneq malillugu naggataagut inaarutaasumik nalunaarummik Inatsisartut Naalakkersuisullu siulittaasuinut tunniussissapput.
Inuusuttut Inatsisartui pillugit uani nittartakkami inu.gl-imi annertunerusumik paasisaqarit.