Inuusuttut Inatsisartuinut peqataasussat ujartorneqartut

Inuusuttut 18-iniit 24-nut ukiullit politikernermik nuannarisaqartut maanna periarfissaqalerput Inuusuttut Inatsisartuini 2015-imi peqataanissaminnut. Inissat 36-t qinnuteqarfigineqarsinnaapput Inuusuttut Inatsisartui 2015-imi ingerlanneqarnissaannut.

Inatsisartut Allattoqarfiat taama ilisimatitsivoq.

Inuusuttut Inatsisartui 2015-imi naapisinneqarpata sammineqassaaq ‘Inuusuttut akornanni suliffissaaleqineq, inuusuttut akornanni suliffissaaleqinermik ajornartorsiut annertusiartortoq qanoq iliuuseqarfigisinnaavarput?’.

Oqallinnerlu Inuusuttut Inatsisartuisa Facebookimi quppernerani ingerlanneqalereerpoq.

Inuusuttut naapisinneqarunik Inatsisartut oqartussaaqataanerlu pillugit tunngaviusumik ilisimasassanik tuniorarneqassapput kingornalu inuusuttut akornanni suliffissaaleqineq pillugu oqallikkumaarlutik.

Assit Inuusuttut Inatsisartui 2013-imi ingerlanneqarneraneersut uani takukkit

- Isiginnaagassiamik takutitsisoqassaaq, nalorsitsaarisoqarluni, sammisamut immikkut ilisimasalinnit saqqummiussisoqarluni Inatsisartullu ataatsimiittarfianni, siunnersuutinik suliarisimasanik saqqummiussiviusumik illersuiffiusumillu, ataatsimiittoqarluni, Inatsisartut Allattoqarfiat taama allappoq.

Inuusuttut Inatsisartui 2015-imi naammassigunik pisarneq malillugu naggataagut inaarutaasumik nalunaarummik Inatsisartut Naalakkersuisullu Siulittaasuinut tunniussissapput.

Peqataanissamut qinnuteqarsinnaanermut ulloq 31. oktober 2014 killiliunneqarpoq. Nittartakkakkut inu.gl-ikkut oqarasuaammulluunniit (iPhonemut Androidimulluunniit) inu.gl-ip app-ia aariarlugu peqataanissamut qinnuteqartoqarsinnaavoq.