Inissianut inissaqalersitsiniarluni Qasigiannguit iluarsaanneqassaaq

Angallatinik allanillu ukiuunerani toqqortaateqartarfiusumit Nuummi Qasigiannguanit pigisatik tamaasa aasartinnagu peereersimassavaat.

Tassami tamanna Qasigiannguit inissiaqarfittut atorneqalissaaq.

Atuaruk: Innuttaasut affaat Nuummi najugaqassapput

Kommuneqarfik Sermersuup januaarip 31-anni allagarsiussaani tamanna atuarneqarsinnaavoq.

- Angallatinik, angallataasivinnik atortunillu allanik piginnittut, atortutik juunip aallaqqaataa 2017 peereersimassavaat, allagarsiussami allaqqavoq.

Inissiat 90-t sananeqalersut
Kommuneqarfik Sermersuup illoqarfiit pingaarnersaat pillugu periaasissaanut anguniagaanut atatsillugu sanaartortitsinissamik akuersinera, Qasigiannguit iluarsaanneqarnissaanik pissuteqarpoq, tassa Akornanni - inissiat 90-t. Maannalu kommunip pilersaarutaanut tapiliussamut siunnersuummik piareertoqareerpoq, taannalu kommunip Sanarfinermut Avatangiisinullu Ataatsimiititaani suliarineqassaaq.

Suliniut, Akornanni - inissiat 90-t assigiinngitsuussapput, assigiinngitsunillu angissuseqarlutillu pigineqartassallutik - tasssa imaappoq, attartortakkat, piginneqatigiilluni inissiat aamma illut nammineq pigisat.

Inuiaqatigiit assigiinngitsut kissaatigineqartut
Nunaminertap kujasinnerusortaani illut inissianik mikinernik imaqassapput, pingaarnertut ilinniartunut ilaqutariinnullu isertitakinnerusunut naatsorsuussaassallutik, ataatsimiititap oqaluuserisassaani oqaaseqaatigineqarpoq.

Nunaminertap avannarpasissortaani illut ilaqutariinnit ataatsinit marlunnillu najugarineqartussat sanaartorneqassapput, taakkua naatsorsuutigineqarput nammineq pigineqarnissaat.

Atuaruk: Nuummi takorluukkat kamaatigineqartut

Piginnittut assigiinngitsut piuneranni naatsorsuutigineqarpoq ineqartut assigiinngiiaarnerannut ilapittuutaanissaat, tamanna ingerlatsivimmit pitsaasutut nalilerneqarpoq kommunimillu ineriartortitseqqinnissamut pilersaarummut naapertuulluni, oqaaseqaatini tamanna atuarneqarsinnaavoq.

Isikkiviit pingaartinneqartut
Siunnersuummik suliaqarnermi illut pioreersut isikkiveqaannarnissaat pingaartinneqarpoq, aamma illut sanaartugassatut pilersaarutaasussat annerpaamik 2,5-inik quleriiussapput assigiinngisitaartunik angissuseqarlutik quleriiaanit, uigulukuttunut taamatullu illunut ilaqutariinnit ataatsinit marlunnillu najugaqarineqartutut.

Aammattaaq paaqqinnittarfik meeqqat ukioqqortussusiinut agguataarnagit inissiiviusartussaq sanaartornissaa pilersaarutaavoq, kiisalu taakkununnga ilanngullugit skatertarfik illoqarfimmit tamanit soqutigineqartussatut naartsorsuutigineqartoq.

Kommuneqarfik Sermersuup Nuummi illoqarfiup ineriartortinnissaanut pilersaarutissaa aqagu saqqummiutissavaa, tassani inissiat katillugit 1600-t ilaapput. Illoqarfiit pingaarnersaat pillugu periaasissaq naapertorlugu sullorsualiornissaq, atuarfiliornissaq, utoqqaat illualiornissaq aamma paaqqinnittarfiliornissaq pilersaarutaapput.