Inatsisitigut ataataqanngitsut: Naalagaaffimmut eqqartuussisulersuineq Østre Landsret-imi ingerlanneqassaaq
Inatsisitigut ataataqanngitsut oqaaseqartartuat, Klaus Frederiksen nuannaarpoq tusarlerneqaramik suliaq eqqartuussisutigut ingerlatartik Østre Landsret-ikkoortussanngormat. - Tamanna isumaqarpoq ajorsassagaluarutta eqqartuussiviit qullersaat angutserlugu suliamik ingerlatsisinnaalertugut, taanna nassuiaavoq.
Inatsisitigut ataataqanngitsut 2014-mili eqqartuussivitsigut ataatassarsiuussinermik inatsisitigut aalajangersakkat malillugit aallartitsisinnaatitaalernikuupput. Sulili apeqqut naammassineqanngitsoq tassaavoq naalagaaffiup anoq ililluni inuit taakkorpiaat inatsisit aqqutigalugit kikkunnit kingoqqisuunerminnik ilisimannissinnaatitaaffiiarsinnaasimaneraat.
Inatsisitigut ataataqanngitsut naalagaaffiup utoqqatsernissamik taarsiiffiginninnissamillu itigartitsilluinnarnerata kingunerisaanik aalajangertariaqalernikuupput suliaq eqqartuussivitsigut ingerlanneqassasoq.
- Tamanna aqqusaarusunnginnikuugaluaqaarput, naalagaaffik paaseqatigerusunnikuugaluarparput oqaluttuarisaanermi kanngunartuliap taassuma ajunngitsumik matuneqarnissaa pillugu, taamaattorli naalagaaffik malartitassaanani itigartitsinikuuvoq, allamillu aqqutissaarunnikuuvugut naalagaaffiup eqqartuussisulersuunnissaa periarfissatuarilerlutigu, Klaus Frederiksen Sermitsiaq.AG-mut erseqqissaavoq.
Civilstyrelsep akiligaanik eqqartuussivitsigoortitsissapput
Inatsisitigut ataataqanngitsut Østre Landsret-ikkut suliamik ingerlatsisinnaalernerat taannaannaanngilaq. Tassami danskit inatsisinik atuutsitsinermi ministeriaat inatsisitigut ataataqanngitsunut ssammik isumalerujussuarmik isaassivoq. Tassami eqqartuussisutigut suliamik ingerlatsinermi aningaasartuutissat naalagaaffimmit akilerneqartussanngornikuupput, tamanna isumaqarpoq inatsisitigut ataataqanngitsut ernumasariaaruttut eqqartuussinermut atatillugu aningaasartuutissat qanoq ilillutik matussusissanerlugit.
Tassami suliamik akiliinani ingerlatsisinnaatitaaneq isumaqarpoq, naalagaaffiup karsiata akiligaanik suliaq ingerlanneqarsinnaasoq, eqqartuussissuserisunut akiligassat ilanngullugit, aammalu eqqartuussisulersuinermi ajorsassagaluaraanni sassartinneqartunut aningaasartuutit ilanngullugit naalagaaffiup karsianit akilerneqartussanngorlutik.
Østre Landsret-imi ingerlatsisussanngornikkut matut ammarneqartut
Aamma inatsisitigut ataataqanngitsut Østre Landsret aqqutigalugu suliamik ingerlatsisinnaanngornerat isumaqarpoq eqqartuussivimmi tassani ajorsassagaluarunik eqqartuussiveqarfimmi qullerpaamut, højesteret-imut suliaq ingerlateqqissinnaaleraat:
- Assut uagutsinnut toqqissiallannarpoq suliap Østre Landsret-imi ingerlanneqartussanngornera, tassami matut taamaalillutik ammarneqarput ajorsassagaluarutta eqqartuussiviit qullersaannut ingerlatsisinnaanissatsinnut, tamanna pisariaqalissagaluarpat. Aamma uagutsinnut toqqissiallannarpoq naalagaaffiup ataani ingerlatsivimmit isumalerujussuarmik fri proces-imik isaassiffigineqarnerput. Tamatumalu saniatigut aamma inuit pisinnaatitaaffii pillugit naalagaaffiup ingerlatsivianit tamakkiisumik tapersersorneqarluta suliaq ingerlassinnaalernikuugatsigu, Klaus Frederiksen Sermitsiaq.AG-mut nassuiaavoq.