isumalioqatigiissitaq
Illuatungiliuttut tunngaviusumik inatsisissamut isumalioqatigiisitami annaasaqartut
Tunngaviusumik inatsimmut isumalioqatigiisitap katitigaaneranut tunngaviusoq imaaliallaannaq allanngortinneqarpoq, taamaalilluni illuatungiliuttuni partiit annersaata siulittaasup tulliattut inissaq pissarsiarissanngilaat.
- Ernumanartorujussuuvoq, Michael Rosing illuatungiliuttut partiit annersaannit Demokraatineersoq, taama Sermitsiaq.AG-mut naqissusiivoq.
Ukiaanerani 2016-imi ataatsimiinnermi nalunaarusiami saqqummiunneqartumi, siulittaasuuffik naalakkersuisoqatigiinni partiit annersaannut tunniunneqassasoq aamma siulittaasumut tulliuffik illuatungiliuttuni partiit annersaannut tunniunneqarnissaa aalajangiunneqarsimagaluarpoq.
Aamma atuaruk: Tunngaviusumik inatsisissamut isumalioqatigiissitamut amerlanerussuteqartut
Kisianni naalakkersuisoqatigiit katitigaanerat allanngortinneqarnikuuvoq.
Akissut: Eqaannerusumik ingerlatsineq
Namminiilivinnermut, Pinngortitamut, Avatangiisinut Nunalerinermullu naalakkersuisumit, Suka K. Frederiksenimit (S), Michael Rosingimut akissummi allannguineq ima tunngavilerneqarpoq: ''Innuttaasut eqqarsaatigineqarnissaat aammalu eqaatsumik sulianik ingerlatitsinissaq, Inatsisartuni partiit anginersaasut marluk Tunngaviusumik Inatsisissaq pillugu Isumalioqatigiisitalimi siulittaasumik aamma siulittaasup tullianik toqqaassasut pillugu aalajangernermi pingaartinneqarput''
''Taamaaliornikkut nunatsinni partiit anginersaasut marluk – innuttaasut amerlanersaannut sinniisaasut – inissisimaffinni pingaarnerpaani marlunni inissinnissaat qulakkeerneqarpoq. Tamannalu aamma isumalioqatigiisitap sulinerata sunniuteqarluartuunissaata qulakkeernissaanut iluaqutaassaaq.''
Aamma atuaruk: Tunngaviusumik inatsiseqalernissamut isumalioqatigiissitami inissat agguataarneqartut
- Taanna akissut isumaqanngilaq, Michael Rosing naqissusiivoq, nassuiaavorlu:
Oqartussaaqataanerup isumaa
- Siulittaasuuffiit marluk partiinit naalakkersuisoqatigiinneersunit inuttaleraanni, isumaqatigiinngissuteqartussaanngimmata soorunami eqaannerulertussaavoq. Taavami Inatsisartut suliaannut tunngatillugu. Partiit akornanni isumaqatigiinnginneq isumaqatigiissusiornikkut naaperiutigineqartussaavoq, Michael Rosing oqarpoq, naqissusiillunilu:
- Tamanna tamat oqartussaaqataanerisa siunertaraa. Illuatungiliuttullu isumalioqatigiisitami siulittaasuuffik aqqutigalugu, tunngaviusumik inatsimmik suliaqarnermi oqaaseqarsinnaanissaat pingaaruteqarluinnarpoq.