Skip to main content

Illoqarfinni immikkoortortaqarfiit suliumajunnaarnissamut piareersimapput

Suliumajunnaarnissamut kaammattuinerit nunatsinni amerliartorput. SIK-p immikkoortortaqarfii Sermitsiaq.AG-p attaveqarfigai, taakkulu amerlanersaat suliumajunnaarnissamut tapersiipput.

SIK-p Namminersorlutillu Oqartussat akornanni isumaqatiginninniarnerit unittooqqanerat naammaginagu takutitsissallutik, SIK-p Uummannami Qeqertarsuarmilu immikkoortortaqarfii suliumajunnaarnissamik kaammattuuteqarput.

Sermitsiaq.AG immikkoortortanut allanut sianeqattaarpoq immikkoortortat allat qanoq isummerneri pillugit tusarniaalluni.

Affaat suliumajunnaarnissamik kissaateqarput

Immikkoortortat arfineq-marluk Sermitsiaq.AG-p attaveqarfigisinnaasimavai, taakkunannga sisamat SIP Uummannap SIP Qeqertarsuullu suliumajunnaarnissamik kaammattuinerat taperserpaat.

Immikkoortortat suliumajunnaarnissamik kaammattuuteqartut ukuulerput:

  • Uummannaq
  • Qeqertarsuaq
  • Aasiaat
  • Ilulissat
  • Kangaatsiaq
  • Upernavik

Sermitsiaq.AG-p attaveqarfigisinnaasimasai pingasut kingulliit, suliumajunnaarnissamik kaammattuuteqarneq pillugu ataatsimeereerunik aatsaat aalajangissanerarput.

- Akissarsiatta qaffanneqarnerunissaat piumasariaqarparput. Ilaasortatta akissarsiaat qaffanneqarnerunngippata, pisiassallu ullumikkut taama akisoreertigisut, isumaginninnerup iluani ilungersunartoqalissooq. Nunarput taamaaliornissamut akissaqanngilaq, Else Jonna Villadsen, SIK-p Ilulissani immikkoortortaqarfiani siulittaasoq, SIK-milu siulersuisuni ilaasortaq, Sermitsiaq.AG-mut oqarpoq.

LÆS OGSÅ: Arlallit suliumajunnaaratarsinnaasut

Illoqarfinni allani immikkoortortat sinneruttut arfineq-pingasut saaffigigaluaratsigit akineqarsimanngilagut.

Akunnermut 0,92 øremik qaffaaneq

SIK Namminersorlutillu Oqartussat siorna apriilip 24-ani akissarsianut tunngatillugu isumaqatiginninniarlutik aallartipput, maannali unittooqqallutik.

SIK-p Uummannami immikkoortortaqarfiata ilaasortat suliumajunnaanissaanik kaammattuuteqarnera, ippassaq oqaluttuaraarput.

- Isumaqatigiinniarnerit ukioq ataasinngorluinnalerpoq aallartimmata, illuatungeriillu qanilleriarsimannginnerat narrujuumminarpoq. Illuatungeriit isumaqatigiissinnaannginneranni ilaasortat kiggisinneqarput, Jokum Zeeb ippassaq oqarpoq. Taanna isumaqarpoq illuatungeriit isumaqatigiissinnaanngippat alloriarneq tulliusariaqartoq suliumajunnaarneq.

Kingullermik SIK-mi ilaasortat 2003-mi suliumajunnaarput. Aggustip 12-ani 2003-mi aalisakkerivinni sulisut sanaartornermillu suliaqartut SIK-mi ilaasortaasut suliumajunnaarput, SIK-p Sulisitsisullu akornanni isumaqatigiinniarnerit isamimmata. Suliumajunnaarneq ullunik tallimanik sivisusussuseqarpoq. Kingornalu SIK Sulisitsisullu isumaqatigiissuteqarput SIK-p ilaasortaasa akissarsiaat ukiuni pingasuni tulliuttuni katillugit 8 procentinik qaffaavigineqassasut.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER