Arlallit suliumajunnaaratarsinnaasut

SIK-p Namminersorlutillu Oqartussat akornanni isumaqatiginninniarnerit unilluinnarsimapput. Illoqarfinni immikkoortortat suliumajunnaarnissamik suaartaateqalerput.

Siorna apriilip 24-ani SIK Namminersorlutillu Oqartussat isumaqatiginninniarlutik aallartipput. Isumaqatiginninniarnerit qaammatini qulingiluani ingerlanneqareersimalerput, illuatungeriilli qanilleriarsimanngillat. Isumaqatiginniiarnerit unittoorsimapput, tamannalu SIK-p Uummannami immikkoortortaqarfiata naammagisinnaanngilaa.

- Alloriarneq tulliusariaqartoq tassaavoq ilaasortatta suliumajunnaarnissaat, illoqarfinnilu immikkoortortaqarfiit tamaasa kaammattorusuppakka suliumajunnaartoqarnissaanut piareersassasut, SIK-p Uummannami immikkoortortaqarfiani siulittaasoq, Jokum Zeeb, Sermitsiaq.AG-mut oqarpoq.

Taanna isumaqarpoq immikkoortortaqarfiit ‘malaamiataaginnarlutikutaqqerusaaginnarsinnaanngitsut’ SIK-p Namminersorlutillu Oqartussat isumaqatiginninniarnernik ‘unitsitsigallarneranni’.

Narrujuumminarluinnartumik arriippoq

Jokum Zeeb isumaqarpoq isumaqatiginninniarnerit arriippallaamik ingerlasut, ilaasortallu pillugit illuatungeriit annikitsunnguamilluunniit qanillilaarsinnaasut.

- Isumaqatigiinniarnerit ukioq ataasinngorluinnalerpoq aallartimmata, illuatungeriillu qanilleriarsimannginnerat narrujuumminarpoq. Illuatungeriit isumaqatigiissinnaannginneranni ilaasortat kiggisinneqarput, Jokum Zeeb oqarpoq.

SIK-p Qeqertarsuarmi immikkoortortaqarfiata Jokum Zeeb taperserpaa. Tassani siulittaasoq, Anda Kristiansen, isumaqarpoq kanngunarluinnartuusoq Namminersorlutik Oqartussat SIK-p ilaasortaanut annikitsuinnarmik akissarsialiiniarnera.

- Kanngunaraluassusiali Namm.Oqartussat anguniarpaat peqareersut suli pisuunngortsinniarnissaat pissakinnerillu piitsunngorsarneqarnissaat. Ataastsimut oqaatigalugu mittatilliineq, SIP Qeqertarsuarmi siulittaasoq, Anda Kristiansen, tusagassiutinut nalunaarummini allappoq.

Nuna tamakkerlugu suliumajunnaarnissaq

Nuummi portørit tallimanngorpat akunnerni sisamani sulinerminnik unitsitsissallutik, taamatullu SIK-p Namminersorlutillu Oqartussat akornanni isumaqatigiinniarnerit oqaluuserissallugit nalunaareerput.

Jokum Zeeb aamma Anda Kristiansen isumaqarpoq suliumajunnaarneq suliffinni aalajangersimasuinnarni pissanngitsoq. SIK-p ilaasortai tamarmik suliumajunnaartariaqarput, ilaasortat piumasarisaat paasineqaqqullugit.

- Naatsorsuutigaarput akissarsiagut annertunerulissasut. Naatsorsuutigaarputtaaq sulinermi atugassarisagut pitsaanerulersinneqassasut. Qanoq pingaaruteqartiginera takutikkumallugu SIK-mi ilaasortaasut tamarmik suliumajunnaartariaqarput, Jokum Zeeb Sermitsiaq.AG-mut oqarpoq.

Powered by Labrador CMS