Ilisimatusarfik pinngortitamik ilisimatusarfeqalerusuppoq inissaqarnerulerlunilu

Inuusuttunut Danmarkimut aallaqqaaratik nunatsinni pinngortitamut ilisimatusarfimmi ilinniarusullutik kissaateqartut neriuutissaqarput.

Tassami Nuummi Ilisimatusarfik annertusarneqarpoq, pinngortitamillu ilisimatusarfimmik aallartitsinissaq sulissutigineqartoq, retkor Tine Pars ilisimatitsivoq.

Læs: Ilisimatusarfimmi atualertut ima amerlatigipput

Ilisimatusarfiup ukiumoortumik nalliussinerani oqalugiarnermini oqaatigaa, nunatsinni nunap isumalluutai aningaasaqarnermut pingaaruteqartut, tamannalu universitetip ilinniakkanik toqqagassaataanik periarfissaasariaqartut.

- Nunami nunap pisuussutaanik uumassusilinnik annerusumik aningaasanik isertitaqartumi aamma aatsitassarsiornikkut isertitarnerulernissamik naatsorsuuteqartumi, pissusissamisuussaaq nunap ilisimatusarfia peqataaguni. Taamaammat universiteti barcheloritut pinngortitamik ilisimatusarfimmik neqerooruteqalernissaanik suliamik aallartitsiniarpoq, oqalugiaammi taama nipeqarpoq.

Universitetemi inissaaleqineq
Kisianni allilertornissaq aningaasaannarnik naleqassanngilaq aammali inissakillinermik kinguneqassaaq. Nunatsinnilu ilisimatusarfimmi maanna inissaqarpallaanngilaq.

- Ilinniartunik amerlanerusunik tigusisinnaaneq ineriartorneruvoq qujamasuutigisarput, kisiannili tamatuma nassataraa ilinniartitsinissamut inissakillinerput.

Maanna Ilisimatusarfiup ilinniarfii Nuummi assigiinngitsunut piffinnut agguataagaapput, universitetillu siulersuisuisa sulissutigaat ilinniartut tamarmik ataatsimut illorsuaqarnissaat.

Aamma atuaruk: Ilisimatusarfimmi ataqqinaammik doktorinngortut marluk