Ikuallatsitsineq: Ikuallaasoqarsimaneranut suliaq politiit suli paasiniarpaat
Nanortalimmi suliaq B-44-p Cafe 44-llu ataasinngornerup unnuaani maajip 20-ani ikuallassimaneranut tunngasoq, Nanortalimmi politiit suli paasiniarpaat.
Nanortalimmi ataasinngornerup unnuaani maajip 20-ani illut marluk ikuallatsinneqarput, sulilu paasiniarneqarlutik.
Ikuallattoqarneraniit ullut aqqanillit qaangiussimalerput, sulili politiit paasisaqarnerunngillat.
- Suliami pasisaqanngilagut. Pialuillu sumiiffimmi nassaarineqarsimasut suli misissuiffigineqarput, Kalaallit Nunaanni Politiini attaveqaqatigiinnermik suliaqartoq, Camilla Palmann Sermitsiaq.AG-mut ilisimatitsivoq.
Pialuit sumiiffimmi nassaarineqarsimasut tassaapput dunkersuit illut ikuallattut marluk eqqaanniissimasut. Dunkit benzinamik imaqarsimapput, imarisaalu illunut kuerarneqarsimagunarput ikuallatsinneqarlutillu. Illut ikuallattut aappariinnit pigineqarput.
Tusatsiakkat illoqarfimmi oqallisaapput
Atisaarniarfik B-44 aamma Cafe 44 kimit ikuallatsinneqarsimanersut pillugu tusatsiakkat Nanortalimmi oqallisigineqartut, Camilla Palmann ilisimatitsivoq. Tusatsiakkalli oqallisigiinnarnagit ilisimasaqaraanni politiit saaffigineqassasut, politiit kaammattuuteqarput.
- Tusatsiakkanik oqaluuserinniinnarnani, ikuallattut pillugit ilisimasaqarsorigaanni politiinut qaqugukkulluunniit saaffiginnittoqarsinnaavoq, oqarpoq.
Innuttaasut politiinut saaffiginnissinnaapput uunga 70 14 48.