IA aamma D: Aqqaluup Nunatta tatiginassusaa apeqquserneqarsinnaalersippaa
Inuussutissarsiornermut Nukissiuutinullu Naalakkersuisup, Aqqalu Jerimiassenip, silaannaap kissakkiartornera ilisimatuut inuillu ilaasa aningaasannanniutigigaat pillugu oqaaseqarnera, isornartorsiorneqarpoq.
Ileqqoq taama ittoq Naalakkersuisuni atuuttariaqanngikkaluarpoq, Demokraatit isumaqarput.
- Naalakkersuisup taama ileqqulersornera akuerineqarsinnaanngilaq. Naalakkersuisutut sulinermi akisussaaffik ipararallarlugu nammineq isummertoqarsinnaanngilaq, kingornalu akisussaaffimmik tiguseqqilluni, Inatsisartuni pinngortitaq avatangiisillu pillugit ataatsimiititaliami ilaasortaq Demokraatineersoq, Steen Lynge Sermitsiaq.AG-mut oqarpoq.
Steen Lyngep erseqqissarpaa Naalakkersuisut eqqaamasariaqaraat aalisartut piniartullu taakkuummata qaninnerpaajullutik silap pissusianik allanngoriartornermik misigisaqartuusut. Naalakkersuisutullu sulinermi inuiaqatigiit ajunnginnerpaamik atugaqarnissaanik sullissisoqartussaavoq, ulloq unnuarlu, ukiuni sisamani qinersinerup atuunnerani.
- Naalakkersuisuugaanni, ulloq unnuarlu, ullut tamaasa Naalakkersuisuusussaavoq, inuiaqatigiit sullisissallugit akisussaaffimmik tigusineruvoq, tulluanngilarlu naalakkersuisut politikkiat uniorlugu isummersorniarneq, Steen Lynge oqarpoq.
Inuussutissarsiornermut Nukissiuteqarnermullu Naalakkersuisoq, Aqqalu Jerimiassen (A) silaannaap kissakkiartornera ilisimatuut inuillu ilaannit aningaasannanniutaasoq pillugu isummernerata kingorna isornartorsiuisoqarpoq. Nalunaarusiarpassuit arlallit naliliipput silaannaap kissakkiartorneranut inuit pisooqataasut. Videnskab.dk naapertorlugu silap pissusia pillugu ilisimatuut 97 procentii isumaqatigiipput oqarlutik silaannaap kissakkiartorneranut inuit pisooqataasut.
Oqariartorneq tupaallannartoq
Inuussutissarsiornermut Nukissiutinullu Naalakkersuisup sisamanngornermi isummernera Inuit Ataqatigiinniit tupaallaatigineqarpoq. Taakku isumaqarput silap pissusia pillugu Naalakkersuisut assigiimmik isummertariaqartut.
- Silap pissusaata allanngoriartornera pillugu inuusuttorpassuit innuttaasullu nunatsinni nunanilu tamalaani iliuuseqaqqusinerat Inuit Ataqatigiit tusaavarput isumaqatigalugulu. Sunniuteqarfigisinnaasatsinni iliuuseqartariaqarpugut. Naalakkersuisunilu ilaasortamit tamanna pisariaqavinngitsutut oqariartorfigineqarnera tupaallaatigalugulu isumaqatiginngivillugu, IA-p siulittaasua, Múte B. Egede Sermitsiaq.AG-mut oqarpoq.
Tatiginassuseq immeraatigalugu
Inuit Ataqatigiit aamma Demokraatit Sermitsiaq.AG-mut erseqqissaapput Naalakkersuisut akisussaaffeqartut, akisussaaffimminnullu tatiginartuusariaqartut.
- Naalakkersuisutut atuunnermi oqariartuuteqaraanni Naalakkersuisut sinnerlugit oqariartuuteqarneruvoq. Tatiginassuseqarluni sulineq tassaniimmat. Suleriaatsip nammineq inuttut isummersoqattaarnermik aallaavillip Naalakkersuisuni nalinginnaasunngortinneqannginnissaa Inuit Ataqatigiit sakkortuumik kissaatigaarput. Sullitatsinnut tatiginassuseqarluta sulisariaqarpugut. Naalakkersuisut oqariartuutigisaat naatsorsuutigisinnaasariaqarpagut Naalakkersuisutummi pisussaaffiliunneqarsimasuni tamanna aamma ilaalluinnarmat, IA-p siulittaasua, Múte B. Egede Sermitsiaq.AG-mut oqarpoq.
- Kalaallit Nunaata tatiginassusaa apeqquserneqarsinnaalerpoq, Steen Lynge oqarpoq.