Skip to main content

Aqqalu: Silap pissusia pillugu ilisimatusartut aningaasannanniarput

Inuussutissarsiornermut Nukissiuuteqarnermullu Naalakkersuisoq Aqqalu Jerimiassen isumaqarpoq silaannaap kissakkiartorneranut inuit pisooqataanngitsut. Isumaqarpoq silaannaap kissakkiartornera ilisimatuut aningaasannanniutigigaat.

Nalunaarusiarpassuit malillugit silaannaap kissakkiartornera sukkatsikkaluttuinnarpoq. Nunarsuaq kissakkiartorpoq, sermersuaq aatsaat taama sukkatigisumik aakkiartorpoq, silaannaallu kissakkiartornerata kingunerisaanik silap pissusia allanngoriartorpoq, inuillu milliuunilikkaat anorersuarujussuartarnerani illuerutsiterlutik.

Inuussutissarsiornermut Nukissiuteqarnermullu Naalakkersuisoq, Aqqalu Jerimiassen allaffimmini issiavoq, silataani perluttorsuusimalluni anoraa qatsoriartorpoq. Nuuk kiattumik sialuttalimmik anorersuarsimavoq, ullualunnguillu sioqqullugu nittaassimammat, aput maanna qillariinnanngorluni serminngorsimavoq.

Aqqalu Jerimiassen isumaqanngilaq silaannaap kissakkiartorneranut inuit pisooqataasut.

- Silaannaap kissakkiartornera imatut upperinngilara. Kisiannili upperaara nunarsuaq nalinginnaasumik ingerlaaseqartoq. Ingerlanerani massakkut kissakkiartorpoq, tamannalu naleqqussarfigissavarput. Nunarsuaq nammineq allanngoriartorpoq, uagut allanngortissinnaanngilarput, Sermitsiaq.AG-mut oqarpoq.

Silaannaq aningaasannanniutaavoq

Taanna isumaqarpoq silaannaap kissakkiartornera inunnit upperineqarnera atorluarlugu, ilisimatuut nalunaarusiatik hunnorujulikkaanik qupperneqartut atorlugit aningaasannanniartartut.

-Ilisimatuut ilaasa aningaasarsiutitut atugarivaat, inuillu ilaasa aningaasarsiutitut atugaralugu. Soorlu Al Gore, illorujussuarmini illoqarpoq oqartarlunilu CO2-mik aniatitsinitsinnut akiliisassasugut. Imminnut assortortumik sulinerit taama ittut uanga akerlerereerakkit, nukissiuuteqarnermut naalakkersuisoq Aqqalu Jerimiassen (A) Sermitsiaq.AG-mut oqarpoq.

Aqqalu Jerimiassen nukissiuuteqarneq pillugu ulluinnarni suliaqartarpoq, assersuutigalugu ataavartunik nukissiuuteqarneq. Naalakkersuisut anguniarpaat nunarput ukioq 2030-mi 100 procentimik ataavatunik nukissiuummik kisimi atuissasoq. Nukissiuutit erngup nukiganit, anorisaatinit seqernullu nukiganit pissapput. Pisortat pigisaanni 67,5 procentii ataavartunit maanna nukissiuuteqarput.

Nunatsinni ataavartumik nukissiuuteqarnerup 100 procentinngortinneqarnissaa silaannaap kissakkiartorneranut akiuiniarnertut Inuussutissarsiornermut Nukissiuuteqarnermullu Naalakkersuisup atasutut isiginngilai. Ataavartumik nukissiuuteqarnerup kinguneranik ikummatissanut eqqussuunneqartunut aningaasartuutit aamma appassapput.

- Nukissiuutit ataavartut ima isigisarpakka, soorlu solarimik eqqussuinitsinnut annikillisaasussatut. Anguniagaq taanna sulissutigivara, nassuiaavoq.

Malinnaassaaq

Naalakkersuisut Inatsisartulluunniit aalajangerpata silaannaap kissakkiartorneranut Kalaallit Nunaat akiueqataassasoq, nammineq akerliliinaviarnani Aqqalu Jerimiassen erseqqissaavoq.

- Naalakkersuisut inuiaqatigiinnit qinerneqarput. Amerlanerussuteqartut aalajangerpassuk suliassatut taanna tigussuara. Uanga nammineq inuttut taamarsuaq isumaqataaffigiunnanngikkaluarpara, kisianni amerlanerussuteqartut aalajangeraangata, pisussaaffigiinnartarparput tassa taannaassooq akisussaaffik tigusassarput, Aqqalu Jerimiassen Sermitsiaq.AG-mut oqarpoq.

Aqqalu Jerimiassen erseqqissaavoq nammineq isummernini sulininilu immikkoortissinnaallugit.

-Nammineq isumaliutikka suliffinnut atatinnaveersaartarpakkam naalakkersuisutullu akisussaaffik ilisimaaralugu. Nammineq isummersussatillunga ammasupilussuarmik oqalussinnaavunga, suliannut tunngatillugu oqassaguma suliannut taamaallaat tunngasumik oqaaseqarnissara ataqqeqqinnaartarpara.

Taannali aamma isumaqarpoq, silaannaap kissakkiartorneranik oqaluttut oqaluinnaratik aamma qanoq iliuuseqartariaqartut.

- Kanani oqaluttarfimmi (Inatsisartut, aaqq.) silaannaap kissakkiartorneranik nillianerpaaqisut, nilliaannarunnaarlutik namminneq iliuuseqarniarlik. Nilliaannaraluarunik angusaqarnavianngillat, Aqqalu Jerimiassen Sermitsiaq.AG-mut oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER