allakkat
Filateliap frimærkit 24-t saqqummiutissavai
Ukioq manna frimærkit ilaatigut eqqumiitsuliortunit Lisbeth Karlinemit, Julie Hardenbergimit, Bolatta Silis-Høeghimit aamma Miki Jakobsenimit suliarineqarput
Naak kikkut tamarmik ullutsinni mailitigut nassiussisaraluartut, allakkat ilumoortut frimærkillit asseqanngillat.
Tele-Postip frimærkinut immikkoortortaqarfia Tasiilamiittoq, Filatelia, ukioq manna frimærkinik 24-nik saqqummersitsissaaq.
Arnap kalaallisuuinik aammalu ukiup kaajallakkiartortarneranit nangeqattaartulianik ukioq aallarnerneqarpoq.
MIO-mut tapersiineq
Frimærkip nalinganut tapiliussamit sinneqartoorutit ukioq manna meeqqat pisinnaatitaaffeqarnerisa annertusaavigineqarnissaannut ’Meeqqat Inuusuttullu Oqaloqatigiinnittarfiannut’ (MIO-mut) tunniunneqartussanngortinneqarput.
Atuaruk: Ukioq manna frimærkit kingulliit takukkit
Nunat avannarliit frimærkiliaasa ukioq manna qulequtaraat nunani avannarlerni nerisassioriaatsit. Timmisartut pillugit nangeqattaartuliat nuannarineqarluartut frimærkinik nutaanik marlunnik aammattaaq naggaserneqassapput.
Timersorneq
Ukioq manna aammattaaq nutaamik nangeqattaartoqalissaaq, tassalu ’Kalaallit Nunaanni timersorneq’, taakkulu ukiuni marlunni ingerlanneqassapput. Filateliap frimærkit nalinginnaasut Dronning Margrethemik assitallit ilassavai, ukiamullu frimærkit marluk stationeqarfik ilisimatusarfiusoq Zackenberg pillugu saqqummiunneqassapput.
Nangeqattaartussat nutaat ’Kalaallit Nunaat sorsunnersuup aappaata nalaani’ 2020-p tungaanut ingerlassapput. Kunngissakkut ukiut 13-issaat avillugu aappariinnerminnik nalliuttorsiortussaapput, tamannalu nalliuttorsiutigineqassaaq ilaqutariit Kunngissakkut kalaallisoortut frimærkimut assitaliunnerisigut. Ileqqoq malillugu ukioq naggaserneqassaaq juullip nipitittagaanik aammalu ukiup mappianik.
Atuaruk: Frimærkinit tunisanit sinneqartoorutit Tele-Postip Meeqqat Inuunerissunut tunissutigai