ajunngitsuliorneq
Frimærkinit tunisanit sinneqartoorutit Tele-Postip Meeqqat Inuunerissunut tunissutigai
Tunissut annertooq peqatigiiffiup suliniummik nutaamik aallartitsinissaanut iluaqutaassaaq
Peqatigiiffik 'Meeqqat Inuunerissut / Bedre Børneliv' (MIBB) Tele-Postimit 150.000 koruuninik tunissuteqarfigineqarpoq.
Aningaasat tunissutigineqartut 2013-imi frimærkimut tapiliussatut tunisanit sinneqartoorutininngaanneerput. Frimærki eqqumiitsuliortumit Nikolaj Andersen Olsvigimit suliarineqartoq, ukiuni marlunni nioqqutaavoq.
- Meeqqat pisinnaatitaaffiinik sulialik MIBB tapersersorsinnaagatsigu nuannerpoq. Peqatigiiffik MIBB meeqqat pisinnaatitaaffiinik annertoqisumik suliaqarpoq, 2013-imilu frimærkip nalinganut tapiliussamit sinneqartoorutinik tigusisussaviulluni, frimærkinut pisortaq Allan Pertti Frandsen erseqqissaavoq.
Akerliussutsimik takutitsineq
Peqatigiiffiup sulinermini Naalagaaffiit Peqatigiit Meeqqat Pisinnaatitaaffii pillugit aalajangersagai aallaavigai, peqatigiiffillu Meeqqat Inuunerissut 2007-imi novemberimi illoqarfinni arlalinni akerliussutsimik annertuumik takutitsisoqareersorlu pilersinneqarpoq.
Aaqqissuisut kajumissaaripput inuiaqatigiit, minnerunngitsumillu qinikkat, meeqqat ulluinnarni inuunerannik illersuissasut, aammalu meeqqat atugaat annerusumik sammineqartariaqartut.
Ukiuni 2012-imiit 2015-imut peqatigiiffiup suliaq annertooq, Villumfondenimit aningaasalersorneqartoq 'Kuseriarnerup siaruarneratut' ingerlappaa.
Suliassap tullia
Suliassaq tulleq MIBB-ip maanna ineriartortinnialerpaa.
- Frimærkip tunisaaneranit sinneqartoorutinik Tele-Postip uatsinnut tunissuteqarnera ikiorsiinerujussuuvoq kajumissaaterujussuullunilu. Suliarujussuatta ’Kuseriarnerup siaruarneratut’–p maannakkut naammassisimalernerani suliassatta tullianik aallartitsinialerpugut tapiissutissanillu qinnuteqaqattaalerluta. Nukippassuit atorneqartussaapput, tassami siulersuisut piumassuseq aallaavigalugu sulimmata. Tele-Postip tunissutai arlalinnik periarfissiipput pisinnaanngisaraluatsinnik, MIBB-imut siulittaasoq Katrine H. Nathanielsen oqarpoq.