Ernisussiortut naartuersinnerit pillugit: Ernisussiortut pitsaaliuinermi atorluarsigit
Naartuersittartut ukiumut 900-t sinneqartarnerat Ernisussiortut Kattuffiata ernumanartoqartippaa. Naartuersittarnerli tamatigut arnat pisinnaatitaaffigiuassagaat, isumaqarput.
Ernisussiortut Kattuffiata Nunatsinni naartuersittut ukiut tamaasa amerlanerujussuat ernumanartoqartippaa. Naartuersittarnerillu amerlanerujussuat Inatsisartuni oqallinnerni sammineqalernerat nuannaarutigalugu.
Nunatta Qitornaanit Aleqa Hammondip Inatsisartuni ilaatigut apeqquserpaa naartuersittartut amerlanerat, aammalu tikkuarlugu naartuersittarnerup akeqannginnera peqqutaaqataasinnaasoq.
- Ernisussiortut Kattuffiata Inatsisartuni oqallittoqalernera nuannaarutigaa, ajornartorsiummi qaangerneqarsinnaanngilaq kinguaassiuutit pillugit ilinniartitsineq annertunerusumik aningaasaliiffigineqanngippat, ernisussiortullu kinguaassiornermi mianerisassat pillugit ilinniartitsisinnaasut annertunerusumik atorlualinngikkutsigit, EK-p siulersuisui, Anne Schurmannimik siulittaasoqartut, tusagassiorfinnut nalunaaruteqarlutik ilisimatitsipput.
Naartuersissinnaanermulli pisinnaatitaaffik passunneqartariaqanngilaq:
- EK-p erseqqissarusuppaa arnap 18-inik ukioqalereersimasup naartuersissinnaanera pisinnaatitaaffiummat pingaaruteqartoq! Arnat inersimalereersut naartuinnarusunnerlutik imaluunniit naartuersikkusunnerlutik namminneq aalajangiisinnaanerat pingaaruteqarluinnarpoq.
Naartuersinnerit 902-t
2019-imi naartuersinnerit 902-t suliarineqarput. Taakkunannga 161-it inuusuttuaraapput, inuusunnerpaat 13-inik ukioqarlutik.
Ernisussiortut Kattuffiata "ajornartorsiuterujussuartut" isigaa niviarsiaqqat ima inuusutsigisut, allaat pinerluttulerineq pillugu inatsit naapertorlugu atoqateqarsinnaanermut ukiukippallaartut, angajoqqaatik oqartussaasulluunniit allat akuersiseqqaarlugit naartuersinnissamut aalajangersinnaanerat pineqartariaqalertarnerat.
EK-p kaammattuutigaa ernisussiortut amerlanerulernissaat anguniarneqassasoq kissaatiginagulu naartulersoortarnerup pinngitsoortinneqarnissaa anguniarlugu ernisussiortut pisinnaasaat atorluarneqarnerusariaqartut.