Inuusuttuaqqat 161-it naartuersittut

Arnap kialuunniit naartuersittariaqalernissaminik pisariaqartitsilernissani kissaatigisanngilaa. Taamaakkaluartoq naartuersittartut amerlasoorujussuupput arnanullu inuusuttunut ernumanarluni.

Coronap ajornartoortitsinera peqqissutsimik suliaqartut kisingajaat aallutilerpaat. Ajornartorsiutilli allat takkuttalerput, sulilu iliuuseqarfigineqarsimanatik. Nunattali nakorsaaneqarfia kisitsisinik tamakkununnga tunngasut ilaannik arajutsisitsilluni avammut saqqummiussivoq:

Naartuersittarnerpassuarnut ukiut tamaasa pisartunut kisitsisit.

2019-imi naartuersinnerit 902-nik amerlassuseqarput. Taamaalilluni nunami maani inunngortartut naartuersittarnerillu suli amerlaqatigiingajapput, kisitsisillu pitsaasup tungaanut aallariarsimallutik. Tassami siorna naartuersittut 2018-imut naleqqiullugit 29-nik ikileriarsimagamik, aviisi AG allappoq.

Pitsaanngitsoq uteqattaartoq

Kisitsisit misissoqqissaaraanni paasinarsivoq, arnat naartuersittut amerlanersaat 20-t 29-llu akornanni ukioqartut. Aammali inuusuttuararsuit – 13-14-inik ukiullit – taakkununnga ilaapput. Inuusuttuaqqat katillugit 161-it naartuersipput, taakkunannga arfinillit 15-it inorlugit ukioqarlutik.

Naartuersittuni arnaq utoqqaanerpaaq 45-nik ukioqarpoq.

Nunatta Nakorsaaneqarfianit kingusinaarluni naartuersinnerit aamma takussutissartalerneqarput, taakku tassaallutik sapaatip akunneri 12-it naartoreersunik naartuersinnerit. Taama naartuersittut 2019-imi 14-iupput, taakkununnga ilaallutik allaat sapaatip akunnerini 19-ini, 20-ni aamma 21-ni naartoreerlutik naartuersittut.

Naartuersittarnermik ajornartorsiut qaqutiguinnaq Inatsisartuni oqallisigineqartarpoq, maannali ukiakkut ataatsimiinnermi sapaatip akunnerini arlaqanngitsuinnarni ingerlareersumi, sammisaq tamanna oqaaseqartunit arlalinnit oqaaseqarfigineqareerpoq. Tamatuma eqqumaffigineqarnerunissaanut kissaateqartut ilagaat Aleqa Hammond, Nunatta Qitornaaneersoq.

Allaaserineqartoq aviisimi AG-mi, aqagu pingasunnngornermi saqqummertussami, tamakkiisumik atuarneqarsinnaavoq. Aviisi uani pisiarineqarsinnaalereerpoq:

Powered by Labrador CMS