Erik Jensen: Oqaloqatigiinnerit pitsaasumik ingerlapput
Siumumi siulittaasup naalakkersuisoqatigiinni ilaasortanut oqaloqatiginninnini angusaqarluarfiusutut taavai. Siumulli siulittaasortaava aamma Naalakkersuisunut siulittaasutut inissisimalissanersoq pillugu apeqqut suli akineqanngilaq.
Siumumi siulittaasunngortup naalakkersuisoqatigiinni ilaasortat sapaatip akunnerani matumani ataatsimeeqatigalugit oqaloqatigai. Siumumi siulittaasoq aamma Naalakkersuisuni siulittaasuussanersoq pillugu apeqqut suli akineqanngilaq.
Partiimi siulittaasup Siumut aqutsisuisa naalakkersuisoqatigiinnilu ilaasortat akornanni oqaloqatigiinnerit angusaqarfiusutut taavai:
- Ilisimatitsissutigisinnaavara oqaloqatigiinnerit angusaqarfiusut pitsaasullu ingerlanneqartut. Annertunerusumilli oqaaseqassanngilanga oqaloqatigiissutissat ilaat suli inissivinngimmata, Erik Jensen Sermitsiaq.AG-mut ilisimatitsivoq.
Politik nutaaq inissinniarneqarpoq
Erik Jensen Sermitsiaq.AG-mut siornatigut ilisimatitsisimavoq partiip politikkertaava naalakkersuinikkut sulinermi ilaatigut malunnaateqartikkumallugu oqaloqatigiinnerit aallartikkusullugit.
Demokraatit siulittaasuata, Jens-Frederik Nielsenip Sermitsiaq.AG-mut ilisimatitsissutigaa, oqaloqatigiinnerit Demokraatinit pitsaasumik isigineqartut:
- Oqarsinnaavunga oqaloqatigiinnerit pitsaasut ingerlanneqartut. Oqaloqatigiinnerit qanoq imaqarnersut oqassanngilanga, akunnitsinni isumaqatigiikkatta isumaqatiginninniarnerit tusagassiorfitsigut ingerlanneqassanngitsut, Jens-Frederik Nielsen oqarpoq.