Erik Jensen: Kangerlussuup matunissaanut pilersaaruteqartoqanngilaq
Kangerlussuaq pillugu nalunaaruteqarnerit assigiinngitsut. Kangerlussuup mittarfia maannakkutut takissuseqaannarnissaa Naalakkersuisut sulissutigaat, Erik Jensen oqarpoq. Kangerlussuulli siunissaa suli aalajangerneqanngitsoq, Karl Frederik Danielsen ullut sisamat matuma siorna oqarpoq.
Kangerlussuup matunissaa millilerneqarnissaaluunniit pilersaarutaanngillat, killormoortuanilli pilersaaruteqartoqarpoq.
Aatsitassanut suliffeqarnermullu Naalakkersuisoq, Erik Jensen (S) Sisimiuni innuttaasunut martsip 17-ani 2019-imi ataatsimiisitsinermini taama oqarpoq.
Taama oqarnera videoliaralugu immiunneqarsimavoq, Sermitsiaq.AG-llu video tigummivaa.
Innuttaasunut ataatsimiigiarsimasunut oqarpoq naalakkersuisut Qeqqata Kommunia peqatigilluinnarlugu, nunaqarfiup mittarfeqartup inerisarneqarnissaa sulissutigigaat. Sisimiut Kangerlussuullu akornanni aqqusiniliornissaq, illuaqqiornissaq akunnittarfimmillu pilersitsinissaq ilanngullugit taavai.
Taassuma erseqqissarpaa Kangerlussuup maannatut, 2810-nik takissuseqartinneqarnissaa, Naalakkersuisutut sulissutigigaat.
- Mittarfissuaq 2810-tut piuinnarnissaa sukataarutiginikuuarput, aamma attanneqarpoq, Sisimiuni innuttaasunut peqataasunut oqarpoq.
Suli qulakkeerinnittoqanngilaq
Kangerlussuup piuinnarnissaanik ersarilluinnartumik oqariartuuteqarneq, Kangerlussuup siunissaa pillugu aalajangertoqannginneranik Naalakkersuisut oqariartortareersimanerannut assiguallaanngilaq. Pisortatigoortumik nalunaaruteqarnerni mittarfiit siunissaat pillugit suleqatigiissitaq suliaqartoq innersuussutigineqartarpoq.
Ineqarnermut attaveqarnermullu naalakkersuisoq, Karl Frederi Danielsen (S) Tillie Martinussenimut (SUL) paragraf 37 atorlugu akissutigineqartumut ilassuteqarluni erseqqissaavoq mittarfissuup siunissaa suli qulakkeerneqanngitsoq.
- Kangerlussuup siunisaa pillugu aalajangiisoqarnikuunngilaq, matumani Kangerlussuup allilernissaa imaluunniit aserfallatsaaliornissaa ilanngullugit, Karl Frederik Danielsen apriilip qulingani allappoq.
Aqaguanilu tusagassiutinut nalunaarummini matutitsinissamut periarfissaq ammatillugu allappoq.
- Kangerlussuup siunissaa, tassungalu ilanngullugit matuneqarnissaa, allineqarnissaa aserfallatsaalineqarnissaaluunniit pillugit aalajangiisoqarnikuunngimmat , Karl Frederik Danielsen allappoq.
Oqaaseqarnini attatiinnarpaa
Pele Broberg (PN) paragraf 37 atorlugu martsip 17-ani innuttaasunik ataatsimiisitsinermi qanorpiaq oqartoqarnersoq apeqqutigaa.
Tassunga Erik Jensen (S) ima nassuiaateqarpoq:
- Naalakkersuisut annikillisitsinissamik allanilluunniit suliaqarnerarneqarnerat ilisimasaqarfiginngikkiga, innuttaasunik ataatsimiisitsinerup nalaani oqaatigaara. Aammattaaq oqaatigaara mittarfiup matuneqarnissaa imaluunniit 2810 meterinit annikinnerunissaa ilisimasaqarfiginagu.
“Taamaattoqassannginneranik” oqariartuuteqarneq pilersaarutinik ilisimasaqannginnermut allanngorsimavoq.
Mittarfissuup matuneqarnissaanut ilisimasaqarnani oqaaseqarnini Sermitsiaq.AG-mut ullumi oqaatigeqqippaa. Naak Naalakkersuisoq akisussaasoq periarfissamik ammatitsilluni ullut sisamat matuma siorna tusagassiutinut nalunaaruteqaraluartoq.
- Naalakkersuisuni matusinissamut tunngasumik oqalunneq uanga tusarsimanngisaannarakku, aamma taamatut suliniartumik tusarsimanngisaannarama. Mittarfissuaajunnaarnissaanik imaluunniit allatut atulernissaanik uanga ilisimasaqanngilanga. Matusinissamik oqaluttaqattaartoqarnera kiisalu aamma taama nipilimmik oqariartuuteqaqattaartoqarnera innuttaasunut toqqissisaataanngivikkami, taamatullu Naalakkersuisuni sulisoqannginnera, taanna naqissuserpara, Erik Jensen Sermitsiaq.AG-mut oqarpoq.
Erik Jensenip ilanngullugu erseqqissaatigaa innuttaasut Kangerlussuaq pillugu apeqqutissaqartut Naalakkersuisumut akisussaasumut saaffiginneqqullugit innersuussimallugit.