Skip to main content

Mittarfiit nunaqarfinniittut siunissaat matoqqasumik ataatsimiissutigineqassapput

Kangerlussuup Narsarsuullu siunissami qanoq atorneqassanersut pillugu suliaq aallartippoq. Narsarsuaq heliportinngortinneqassaaq.

Nunaqarfiit mittarfillit siunissaasa qulaajarneqarnissaat, Kangerlussuarmi Narsarsuarmilu innuttaasunit aammalu politikkikkut suliaqartunit, piumasarineqartareerpoq. Suliassarlu kiisami maanna aallartissinnaanngorpoq.

Ineqarnermut attaveqaqatigiinnermullu Naalakkersuisoq, Karl Frederik Danielsen (S) aamma Qeqqata Kommuniani borgmesteri, Malik Berthelsen (S) Kommune Kujallermilu borgmesteri, Kiista P. Isaksen, (S) apeqqut pillugu suleqatigiissitat suliassaat atsioqatigiissutigeqqammerpaat.

Innuttaasulli suliamut malinnaanissamik periarfissaqassanngillat. Suleqatigiissitat marluusut suliassaanni tamanna allassimavoq. Suliat naammassereerpata aatsaat nunaqarfini innuttaasut peqataatinneqalissapput.

-  Suleqatigiissitap suliani kiisalu paasissutissat inerniliussallu taassuma malitsigisai isertuulluinnassavai, suleqatigiissitani erseqqissarneqarpoq.

Heliporti

Siullermeertumilli avammut saqqummiunneqarpoq Narsarsuaq siunissami heliportinngortinneqassasoq.

- Suleqatigiissitap mittarfiup heliportimut allanngortinneqarnissaanut tamatuma nunaqarfimmut Narsarsuarmut kingunissaanik misissuinissaq naliliinissarlu suliassarilerpaa, suleqatigiissitap suliassaatut allassimavoq.

Heliportinngortitsinissamut tunngavigineqarpoq mittarfissuit pillugit inatsimmi aningaasaqarnerup kingunissaa, siunissamili pilersaarutit pillugit paasiniaanermi suleqatigiissitassanut maannamut innersuussisoqaannartarsimavoq.

Ilanngullugu erseqqissarneqarpoq Kangerlussuup siunissami angallannermi inissisimalernissaa suleqatigiissitap qulaajassagaa, kiisalu mittarfiup kommunimut tunniunneqassanersoq qulaajarneqassalluni.

- Suliassat allattorsimaffiisa imaat tamatta isumaqatigiissutigigatsigit, taamaalillunilu suliassat aallartinneqarsinnaalermata nuannaarutigaara, ineqarnermut attaveqaqatigiinnermullu naalakkersuisoq, Karl Frederik Danielsen (S), tusagassiutinut nalunaarummi allappoq.

- Suliassaalersussat kingunerisaannik pisariaqartitanik aalajangersimasorujussuarnik misissuissaagut, taamaalilluta nunaqarfiit marluusut siunissaat ataatsimoorluta paasinarsitissinnaalissagatsigu.

Suliat nalunaarusianngorlugit Naalakkersuisunut kommunalbestyrelsenullu tunniunneqassapput. Tunniussereernerup kingorna nalunaarusiat pillugit Kangerlussuarmi Narsarsuarmilu innuttaasunik ataatsimiitsitsisoqaruamarpoq.

Suleqatigiissitat Namminersorlutik Oqartussanit, kommuninit pineqartunit, Narsarsuarmilu peqatigiiffik “Narsarsuaq Piujuarli”-mit peqataaffigineqarput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER