siulittaasunngorniuunneq
Doris: EU pisuussutitsinnit pissarsissanngilaq
Doris Jakobsen, Siumumi siulittaasussatut aamma sassartoq, EU pillugu oqallinnermut maanna aamma akuleruppoq. Kalaallit Nunaat EU-p pisuussutivut pillugit aalajangiisarnissaanut qulangersimaneqassanngilaq, Doris Jakobsen Nick Nielsenimut illuatungiliilluni oqarpoq
Siumut siulittaasussaatut sassartoq, Nick Nielsen, isumaqarpoq inuiaqatigiit eqqartortariaqaleraat EU-mi ilaasortaanerup iluaqutissartai ajoqutissartaalu.
- Piffissanngorpormi nunarput siammasinnerusumik maanna suleqatisssarsiornissaanut. Danmarki kisimi naammaanngilaq, Nick Nielsen sisamanngornermi taama oqarpoq.
Nunarput ullumi 200 million koruunit missaannik EU-mit ilinniartitaanermut atugassanik ukiumut pissarsisarpoq nunataa EU-mik imartatsinni aalisartitsisarnerata kinguneranik.
- Ilimagilluinnarpara aningaasat suli amerlanerusimasinnaangaluartut EU-mi ilaasortaasimasuugutta, Nick Nielsen oqarpoq.
Atuaruk: Nick Nielsen: Innuttaasut EU eqqartortariaqalerpaat
Doris Jakobsenili, Siumumi siulittaasussatut sassartut ilaat, isumaqarpoq nunarput EU-mut ilaasortanngussanngitsoq.
- Aningaasaqarnikkut ajornartorsiornitta tappiillisissanngilaatigut, akissaqanngilagut EU akisussaaffimmik tunissallugu pisussutitsinnut, Siumumeersoq Doris Jakobsen oqarpoq.
Kisianni Doris Jakobsenip Nick Nielseni oqarmat nunarput siamasinnerusumik suleqatissarsiortariaqalersoq isumaqatigaa.
- Taamaammat isumaqarpunga qallunaat aningaasaliisartut Kalaallit Nunatsinni piumagunik sunniuteqarluarsinnaasut, nunani tamalaani aningaasaliisartunut unammillerlutik. Aamma Danmark tapersiisinnaavoq siunissaq ungasinnerusoq eqqarsaatigalugu, Kalaallit Nunatsinni aalaakkaasumik aningaasaliisarnermut sinaakkutissanik, Doris Jakobsen oqarpoq.
Kisianni Doris Jakobsenip aamma Nick Nielsenip EU ilaasortaalersinnaaneq maanna nunatsinni oqallisigequlermagu tupaallaatigaa.
- Siumut qaammatit sisamat matuma siorna junimi ataatsimeersuarpoq. Politikkikkut anguniagassat aalajangersarneqarput, EU-mulli ilaasortanngornissaq ataatsimilluunniit qaqinneqanngilaq eqqaaneqaraniluunniit, aamma Nick Nielsenimit qaqinneqanngilaq.
- Taamaammat isumaqarpunga Nick Nielsen isumaqaruni EU-mut ilaasortanngornissaq pisariaqarluinnartoq, taava kaammattorusuppara Siumut tulliani ataatsimeersualerpat ukiut pingasut qaangiuppata qulequtaq taanna qaqeqqequllugu.