siulittaasunngorniuunneq
Nick Nielsen: Innuttaasut EU eqqartortariaqalerpaat
Siumumi siulittaasussatut sassartoq, Nick Nielsen, isumaqarpoq nunarput siammasinnerusumik maanna suleqatisssarsiortariaqalersoq. Danmarki naammanngilaq, oqarpoq
Ilinniartitaanermut, kultureqarnermut, naligiissitaanermut ilageeqarnermullu naalakkersuisuusimasoq, aamma Siumumi siulittaasussatut qinigassanngortittoq, Nick Nielsen, isumaqarpoq maanna piffissanngortoq nunatsinni innuttaasut EU-mi ilaasortaanerup iluaqutigisinnaasaanut ajoqutigisinnaasaanullu eqqartuinissaannut.
- Namminiilivinniarutta nunarsuup sinnerani allani suleqatissarsiornissarput pisariaqarpoq, Danmarkimimmi suleqateqarnerput kisimi naammanngilaq, Nick Nielsen Sermitsiaq.AG-mut oqarpoq.
Atuaruk: Jens-Erik Kirkegaard Nick Nielsenimut tapersersuivoq
Nunarput ullumi 200 million koruunit missaannik EU-mit ilinniartitaanermut atugassanik ukiumut pissarsisarpoq nunataa EU-mik imartatsinni aalisartitsisarnerata kinguneranik.
- Ilimagilluinnarpara aningaasat suli amerlanerusimasinnaangaluartut EU-mi ilaasortaasimasuugutta, Nick Nielsen oqarpoq.
Toqqammaverissaarluni oqallittoqarnissaa kissaatigaa
Taamaammat Nick Nielseni isumaqarpoq maanna piffissanngortoq nunatsinni innuttaasut EU-mi ilaasortaanermi iluaqutaasinnaasut ajoqutaasinnaasullu pillugit oqallinnissaannut.
- EU ineriartortitsinermut atugassanik aningaasaliissuteqartarpoq. Nunatsinni ullumikkut soorlu mittarfiliornissamut nunalerinerullu siuarsarnissaanut aningaasaliissutissanik amigaateqarpugut. Taamaammat innuttaasut EU-mi ilaasortaanerup iluaqutaanik ajoqutaanillu oqallittariaqalersut isumaqarpunga.
Nick Nielsenip ersarissumik isummerfigerusunngilaa nunarput EU-mi ilaasortanngortariaqarnersoq.
- Innuttaasut EU paasissutissanik toqqammaverissaarlutik oqallisigisariaqarpaat. Tamatuma kingorna paasinarsiumaartoq taasisitsisoqassanersoq, Nick Nielsen Siumup siulittaasussaatut arfininngornermi Doris Jakobsenimut Kim Kielsenimullu unammillertoq oqarpoq.