Covid-19-ertoq napparsimavimmut unippoq
Munck Gruppenimi sulisoq covid-19-imik tunillatsissimasoq Dronning Ingridip napparsimavissuani unippoq. Inuunerminik navianartorsiunngitsoq, Nunatta Nakorsaanerata Sermitsiaq.AG-imut paasissutissiissutigaa.
Munck-gruppip najugaqarfianiittoq inuk alla coronavirusimik tunillatsissimasoq sisamanngormat paasineqarpoq. Maannalu napparsimasut katillugit sisamaapput peqqissisimasullu 40-llutik. Mittarfissualiortuni tunillatsissimasoq ataaseq nunatta napparsimavissuaanut unittoq, nakorsaanerup ilisimatitsissutigaa.
- Napparsimasoq maanna perululluni napparsimalersimavoq. Inuk pineqartoq inuunerminik navianartorsiunngilaq. Napparsimasup pisariaqartitai aallaavigalugit maanna sullinneqarpoq, nunatta nakorsaanera Henrik L. Hansen Sermitsiaq.AG-imut oqarpoq.
Timmisartoqarfimmi sulisut najugaqarfianni tunillatsittoqaqqittoq sisamanngormat paasineqarpoq. Taanna mattusimareerpoq, tunillatsissimasorlu paasineqarpoq sisamanngormat sulisut tamarmik misissorteqqinnerini.
Pingasut tunillatsissimasut arfininngornermi maajip 29-ani paasineqareersorlu oqartussat Nuummi mattusimaffissaq pilersinneqarpoq. Tamatuma kingorna ataaseq tunillatseqqissimasoq sisamanngormat juunip 11-ani paasineqarpoq.