Corona: KTI-mi ilinniartoq mattusimalluni angerlarsimaannarallartussanngortoq
KTI Sisimiuni ilinniartut, lærlingit, ullumi atuariartussanngitsut ilisimatinneqarsimapput, ilinniartoqataammi ataaseq Aasianni coronamut tunillatsissimasumut piffissami kingullermi qanillisaqarsimavoq.
Ilinniartut, lærlingit, ilaat Aasianni coronamik tunillatsissimasumut qanillivallaarsimasoq paasineqarpoq, taamaammallu KTI-mi sanaartornermik ilinniarfimmi ilinniartut ullumi atuariartussanngillat.
- Ilinniartoq coronamik tunillatsissimasumut qanillivallaarsimasoq paasigatsigu ingerlaannartumik ilinniartoq atuarfimmi illuutit ilaanni angerlarsimaannartussanngorlugu inissipparput. Ilinniartut sinneri, 80-it missaanniittut, atuartussanngitsut ilisimatinneqarput, KTI Sisimiuni forstander, Jokum Møller Sermitsiaq.AG-mut oqaluttuarpoq.
- Mianersornerunissaq tunngavigalugu taama iliorpugut. Imaanngilaq coronamik tunillatsissimasoq. Ilinniartorli coronamut napparsimasumut qanillivallaarsimavoq tunillatsissimasinnaallunilu. Peqqinnissaqarfik attavigineqareerpoq, Jokum Møller nassuiaavoq.
KTI Sisimiut Nakorsaaneqarfimmut attaveqarsimalerput qanoq iliortoqarsinnaanera pillugu. Nakorsaaneqarfiup siunnersuinissaa pitinnagu ilinniartut angerlarsimaannarallarnissamik ilisimatinneqarput, nakorsaaneqarfiullu iliuusissatut siunnersuutai ilinniartunut ullup ingerlanerani nalunaarutigineqarumaarlutik.
Aasianni inuk ataaseq COVID-19-imik tunillatsissimasoq pingasunngormat paasineqarpoq. Aamma paasineqarpoq tunillatsissimasup angerlarsimaannarallarnissamik ingalassimanissamillu maleruaqqusat malissimanngikkai.
Aasianni tunillatsissimasup qanigisatut ilaqutaa Aasianni kommunimut attuumassuteqarluinnartuuvoq, Inatsisartunilu aningaasaqarnermut akileraartarnermullu ataatsimiititaliamik ataatsimeeqateqartussatut angalasunut ilaasimalluni.
Kommune Qeqertalimmit angalasut, tassani borgmester Ane Hansen peqatigalugu, aningaasaqarnermut ataatsimiititaliaq Namminersorlutillu Oqartussani sulisut ilaat angerlarsimaannarallartussanngorput. Soorlu aamma Aasianni innuttaasut qulit angerlarsimaannartussanngortut.
KTI Sisimiuni forstander oqaluttuarpoq angerlarsimanissamik mattusimanissamilluunniit pisariaqartitsisoqalissagaluarpat ininik piareersimasuuteqarsimallutik. Init pineqartut immikkut isertarfeqarput.
Sisimiuni GUX-imi ilinniartut suli atuariartussasut ilisimatitsissutigineqarpoq, KTI-mi sanaartornermik ilinniartunut attaveqartarnerat killeqarmat.