Tunillatsissimasoq malittarisassanik malinnissimanngilaq

Coronamik tunillatsittoqarsimasoq pingasunngormat Aasianni paasineqarpoq. Sisamanngornermi tusagassiortunik katersortitsinermi Nunatsinni Nakorsaanerup Henrik l. Hansenip Naalakkersuisullu Siulittaasuata Kim Kielsenip ilisimatitsissutigaat, tunillatsissimasup taassumalu ilaqutaasa mattusimanissamut malittarisassat malissimanngikkaat.

Tunillatsissimasoq quersorlunilu toqqusaamigut annerisaqalaarsimavoq.

Ilaqutariit suli misissorteqqittoqanngitsoq pulaartoqartarsimapput, tunillatsissimasumullu ilaqutaasoq suliartorsimasoq, naaka tunillatsissimasoq angerlarsimaffimmini ilaquttami akornanniiginnaraluarsimasoq.

Tamatuma kinguneranik Aasianni inuit qulit tunillatsissimasumut atassuteqarsimasut angerlarsimaffimminni mattusimatinneqalersimapput. Pineqartut kingusinnerpaamik sapaatip akunnera ataaseq qaangiuppat coronavirusimut misissorteqqissapput.

Tunillatsissimasinnaasoq Nuummiissimavoq, taamaammat Inatsisartut Aningaasaqarnermut Ataatsimiititaliaani ilaasortat tunillatsissimasinnaasumik ataatsimeeqateqarsimanertik pissutigalugu angerlarsimaffimminni mattusimatinneqalersimapput.

- Mianersornissamik tunngaveqarneq aallaavigalugu ataatsimiititaliami ilaasortat angerlarsimaffimmi mattusimalersissimavagut. Erseqqissaatigissavara, inuit tunillatsissmasumik attaveqarsimasut tunillaasinnaanngimmata, virusi timimi inerissimatinnagu. Tunillatsissimanermit minnerpaamik ullut marluk qaangiukkaangata tamanna aatsaat pisarpoq, Henrik L. Hansen oqarpoq.

Mattusimanermi ilaquttat aamma qanillineqartussaanngitsut

Nunatsinni nakorsaanerup erseqqissaatigaa, mattusimanermi malittarisassat malinneqartussaasut. Danmarkimi tuniluuttoqarnera annertusiartorpoq, tamatumalu malitsigisaanik mattusimanissamut malittarisassat malinneqaqqissaanngippata nunami maani tuniluuttoqaleriaannaalluni.

Angalasimariarluni tikikkaanni ulluni 14-ini mattusimasoqartussaavoq, imaluunniit tikinnermit kingusinnerpaamik ullut tallimat qaangiunneranni misissorteqqinnermi tunillatsissimannginnermut uppernarsaammik takutitsisoqartussaavoq.

- Ilaquttat najornagit mattusimanissaq pingaarutilipilussuuvoq. Najugarisami tamanna periarfissaqanngippat kommuni mattusimanissamut ikiuussinnaavoq, nunatsinni nakorsaaneq ilisimatitsivoq.

Nunatsinni nakorsaanermi innersuussutit nutaat:

Inuit angerlarsimaffimminni mattusimasut pisiniarlutik anisariaqartut qanermut assiaquteqartassapput.

Danmarkimiikkaanni neriniartarfiit, imerniartarfiit katersuuffiusartupilussuillu ingalassimaneqassapput, Danmarkimi tuniluunnerup annertusiartornera pissutigalugu.

Tunillatsissimasumut kinguneqartitsisoqassanngitsoq

Tunillatsissimasoq taassumalu ilaqutai mattusimanissamut malittarisassanik malinnissimanngikkaluartut kinguneqartitsisoqassanngikkallarpoq.

- Malittarisassat qanoq ittuuneri imaluunniit atugassarititaasut allat sorliit atuunnersut inuit nalornissutigisimasinnaavaat. Pisumiilli pisumt nalilersuisoqartassaaq, politimesterilu tassaavoq akiligassiisoqassanersoq pillugu aalajangiisussaq, Kim Kielsen oqarpoq.

Kim Kielsenip naggasiullugut innuttaasunut kaammattuutigaa:

-Mianersorisi. Innersuussutit malissigit uippallerasilu. Tamatuma saniatigut ilungersorlunga qinnuigissavassi nunamiit aallassanngitsusi. Taannami kisiat aqqutigalugu nunatsinni tuniluuttoqalersinnaavoq.