Biskoppi kajumissaaruteqartoq: Tussiarfissuup atorunnaarsinneqarnissaanut siunnersuuteqartoqarnera pissusissamisuunngilaq
Nunatsinni tussiarfissuup atorunnaarsinneqarnissaanut siunnersuuteqartoqarnera uggornarpoq, biskoppi Paneeraq Siegstad Munk taama isumaqarpoq. Nalliuttut nunatsinni ataatsimoorfiupput, taanna isumaqarpoq.
Danmarkimi naalakkersuisut tussiarfissuaq nalliuttutut atorunnaarsinniarpaat, pisortat aningaasaqarnerat pitsanngorsarniarlugu aamma ilaatigut Illersornissaqarfimmut aningaasat amerlanerusut atorneqassallutik.
Politikerip Kristian Jeremiassenip (IA) tassunga atatillugu Kalaallit Nunaat aamma taamaaliorluni nalliuttumik atorunnaarsitsissasoq siunnersuuteqarpoq.
Politikerili Nunatta Karsianut imaluunniit illersornissamut aningaasanik amerlanerusunik pissarsititsinianngilaq, akerlianik nalliuttumik allamik atulersitsiniarpoq – tassa Ullukinneq.
Siunnersuut maanna biskoppimit Paneeraq Siegstad Munkimit akerlilerneqarpoq, taassuma tussiarfissuup atorunnaarsinneqarnissaanik siunnersuummik Inatsisartut pimoorussinnginnissaannik nalunaarummi kajumissaaruteqarpoq.
- Ataatsimoorfiit nalituut
- Nalliuttut suuneri Ilagiinni ingerlatsinerup iluaniittuussut malugeqqunarpoq, aamma nalliuttut suunerisa aalajangersarnissaat Inatsisartunit allanngortinnissaanik saqqummiussinissaq kissaatiginngilara, biskoppi oqaaseqarpoq.
Taamaalilluni danskit ilagiit danskit naalakkersuisuisa pilersaarutaannut sakkortuumik akerliliisut isumaqatigai.
Danmarkimi oqallinneq malinnaaffigineqartoq, Nunatsinni Naalakkersuisut ilisimatitsissutigaat, kisianni tussiarfissuaq Kalaallit Nunaanni atorunnaarsinneqassanersoq suli isummertoqarsimanngilaq.
Paneeraq Siegstad Munkip nalliuttunik atorunnaarsitsinissaq akerlilerpaa, taakkulu inuaqatigiinni ataatsimoorfiunerat pingaaruteqartoq isumaqarpoq:
- Biskoppip nalliuttut kristumiusut oqaluussiffittut aammali inuiaqatigiit ataatsimoorfiattut nalituutut isigai. Nalliuttut piffissaqartilersarpaatigut qasuersaalaarnissamut, akornusersorneqarata eqqarsaqqilaarnissamut aammali nammineq aalajangerlugu soqutigisatta piffissaqarfigilaarnissannut. Taamaattumik Biskoppip pissusissamisoortutut isiginngilaa Kristian Jeremiassenip Tussiarfissuarmik atorunnaarsitsiniarnera, oqaaseqaammi tamanna allaqqavoq.
Eqqisseqatigiinnissaq eqqarsaatigeqqugaa
Piffissami sivisuumi ileqquusoq atorunnaarsinniarneqartoq, biskoppip aamma tunngavilersuutigaa, tassami kong Christian den V-p 1686-imi nalliuttoq atulersimmagu. Tussiarfissuaq alterbogimi taaneqartarpoq.
- Aallaqqaammut tunngaviusoq ilagiit ullormi tassani tateqarnerup qinunermullu piffissaqarnissamik, aamma peqqissimissuteqarnermi kiisalu eqqisseqatigiinnissamik ajortumillu pineqannginnissamut illersorneqarnissamik qinuffittut atorneqartarsimavoq. Ukiuni kingullerni nunatsinni ulloq taanna apersortiffittut atorneqaleriartuinnarpoq, biskoppi nassuiaavoq.
Biskoppip oqarnera naapertorlugu, ilagiit nalliuttumut tunngatillugu eqqisseqatigiinnissaq nunarsuarmilu eqqissinissamut innuttaasut eqqarsaatiginneqqullugit kaammattuiniarput.