'Bevar Narsarsuaq' anivoq
Peqatigiiffik 'Bevar Narsarsuaq' suleqatigiissitamit, Narsarsuup siunissaa pillugu suleiaqartussamit, anissalluni aalajangerpoq.
Suleqatigiissitami suleqatigiinniarnerup ilungersunarnera pissutigalugu, peqatigiiffik 'Bevar Narsarsuaq' suleqatigiissitamit, Narsarsuup siunissaa pillugu misissuillunilu suliaqartussamit, peqataaniarunnaarluni aalajangerpoq.
Peqatigiiffimmeersoq Ole Guldager nalunaaruteqarluni taama nassuiaavoq.
- Taama aalajangernitsinnut pissutaavoq suleqatigiinniarneq ilungersunarmat suleqatigiissitamilu ilaasortaasunut allanut tatiginnikkunnaaratta, allappoq.
Peqatigiiffik nassuiaammini allappoq suleqatigiissitaq nalunaarusiassatut siunnersuummik nutaamik tunineqarsimasoq, misissorneqariarluni akuerineqartussamik. Nalunaarusiatut siunnersuummi pingaaruteqartuni allannguuteqartoqarsimavoq, peqatigiiffiullu pingaartitatut suliai peerneqarsimallutik.
- Pingaartitatut suliarisarput tassaavoq toqqissisimatitsinissamik isumaqatigiissut. Toqqissisimatitsinissamik isumaqatigiissummi anguniarparput Narsarsuaq siunissami matuneqassappat atorneqarneraluunniit annikillineqassappat, tamanna innuttaasunut toqqissisimanartumik pissasoq, Ole Guldager Sermitsiaq.AG-mut nassuiaavoq.
Allaannguutit pillugit ilisimatinneqarsimanngillat
Kommunimi inuussutissarsiornermik suliffeqarnermillu pisortap Namminersorlutik Oqartussat allannguuteqarnissaat akuerisimavaa. Akuersineq suleqatigiissitami ilaasortat ilisimateqqaarnagit pivoq.
- Isumaqarpugut suleqatigiissitat ilaasortaasa ilaat ilisimatinnagit suleriuseq naammaginanngitsoq, taamatullu Namminersorlutik Oqartussat nalunaarusiap imarisaanik allanngortiterinissaanut, kissaatiginngisanillu piiaasinnaanissaannut akuerisisimaneq naammaginanngitsoq, Bevar Narsarsuaq allappoq.
Ole Guldager Sermitsiaq.AG-mut ilisimatitsivoq suleqatigiissitaq suleqatikkuminarnerulissagaluarpalluunniit, qularnartoq peqatigiiffiup peqataaqqilernissaa.
- Tatiginnikkunnaarpugut, suleqatigiissitamilu ilaasortat suleqatikkuminarnerulissagaluarpataluunniit qularnarpoq uteqqinnissarput, oqarpoq.
Narsarsuup siunissaa
Suleqatigiissitat marluk, Narsarsuarmi Kangerlussuarmilu mittarfiit siunissaat pillugit nalilersuisussat januaarimi pilersinneqarput.
Narsarsuarmi suleqatigiissitat suliassaanni allaassimavoq Narsarsuup siunissami heliportinngoratarsinnaaneranut kingunissaat ilaatigut misissorneqassasut. Attaveqaqatigiinnermut Naalakkersuisoq, Karl Frederik Danielsen ilisimatitsivoq suli aalajangertoqarsimanngitsoq.
Sulinerlu Bevar Narsarsuaq peqatiginagu ingerlasussanngorpasippoq.
- Suleqatigiissitami ilaasortat sinnerisa nalunaarusiatut suliarineqaqqaartup “atorunnaarsinnissaa” neqeroorutigigaluarpaat, uagulli naaggaarpugut. Tatigiunnaarpagummi tatigileqqikkunnarnagillu, Ole Guldager allappoq.
Suleqatigiissitat matoqqasumik sulissapput nalunaarusiallu naammassineqartut Naalakkersuisunut kommunalbestyrelsenullu pineqartunut tunniunneqassallutik.