Bacheloritut ilinniakkat aallartinngitsoortut misissuiffigineqarnerat 1,5 mio. kr.-nik akeqartoq
Eqqartuussissuserisup misissuineranit inerniliissutigineqarpoq, ilinniakkat, NI Nuup pilersissallugit pisortatigoortumik akuerineqassutigisimanngisai, pillugit suliami naalakkersuisoq, naalakkersuisoqarfik aamma ilinniarfik inatsisitigut akisussaatinneqarsinnaanngitsut.
Niuernermik Ilinniarfik NI Nuuk 2019-imi upernaakkut bacheloritut ilinniakkanik marlunnik neqerooruteqarpoq. Ilinniakkani nunat tamalaat akornanni niuernermi nittarsaassinermilu kiisalu aningaasarsiornermi isumalluutinillu aqutsinermi ilinniartussat aqqaneq-marluk akuerineqarput.
Kisianni ilinniartussat taakkua aqqaneq-marluk puaatsoorput ilinniarnerup aallartinnissaq ulluni arfinilinnik sioqqullugu paasinarsimmat, NI Nuuk ilinniakkat neqeroorutiginissaannut pisortatigoortumik akuerineqarsimanngitsoq, aamma aningaasanut inatsimmi taakkununnga aningaasanik immikkoortitsisoqarsimanngitsoq.
Maanna Naalakkersuisut suliap ingerlasimaneranik eqqartuussissuserisumut misissuisitsinermi inerniliinerit tamanut saqqummiuteqqammerpaat. Misissuineq Namminersorlutik Oqartussanut 1.576.208,16 koruuninik akeqarsimavoq.
Eqqartuussissuserisoq Ole Spiermann misissuinermik suliarinnittuusimavoq, taannalu naliliivoq, kukkuluttortoqarneranut inatsisitigut akisussaaffimmik inissiisoqarsinnaanngitsoq.
Siulersuisut naalakkersuisoqarfillu pinngitsuutinneqartut
Ole Spiermann NI Nuummi siulersuisut pillugit ima allappoq:
- Naliliinera malillugu najoqqutassaqarani aammalu aningaasaliissutinut inatsimmi tunngavissaqarani neqerooruteqarneq, inatsisitigut ersarilluinnartumik kukkuneruvoq, kisianni taamatuttaaq naliliivunga Naalakkersuisut inuussutissarsiutinut ilinniartitaanermut inatsimmi killissaliussat iluanni, aamma siulersuisut siulittaasuanut, inatsisitigut akisussaatitsisinnaanerannut aammalu qisuariarnissamut periarfissanik aallartitsisinnaanissaannut piumasaqaataasumik, qularnaatsumik annertuumik soqarsimanngitsoq.
Ilinniartitaanermut, Kultureqarnermut Ilageeqarnermullu Naalakkersuisoqarfik aamma pinngitsuutinneqarpoq:
- Naliliinera malillugu tamatuma kingorna, IKIN-imi sulisut najoqqutassatigut inatsimmi tunngavissaqarani aammalu aningaasalersuinermut inatsimmi tunngavissaqarani bachelor-itut ilinniartitaanerit neqeroorutigineqarsimanerannut akisussaatinnissaannut, najoqqutassani pissarsiarineqartuni naammattumik tunngavissaqanngilaq.
Naalakkersuisup ilisimatinnissaanut qaammatini marlunni utaqqisimasut
Eqqartuussissuserisoq uparuaalluni allappoq, naalakkersuisoqarfiup ilinniakkani neqeroorutigineqartuni ajornartorsiummik paasisaqarneraniit naalakkersuisup akisussaasup Ane Lone Baggerip ilisimatinnissaanut qaammatit marlungajaat ingerlasimanerat kukkunerusoq.
- Naliliinera malillugu ilisimatitsissuteqarneq siusinnerujussuakkut pisimasussaagaluarpoq. Tassani suliassanik suliarinninnermi kukkusoqarsimavoq. Naliliinera malillugu suliassanik suliarinninnermi kukkuneq IKIN-imi sulisunut akisussaatitsisoqarnissaanut pineqaatissiisoqarnissaanullu tunngavilersuutaasinnaasumik, annertuutut isigineqanngilaq.
- Peqatigisaanik oqaatigisinnaavara pisup ingerlasimanera Naalakkersuisumut Ane Lone Bagger-imut (imaluunniit taassuma siuliinut) nalilersuinissamik isumaliutersuuteqarnissamut pissutissaqalersitsisimanngitsoq, eqqartuussissuserisoq allappoq.
Allagaatinik takunnissinnaatitaaneq itigartitsissutigineqartoq
Naalakkersuisut tusagassiuutitigut nalunaarummi paasissutissiipput, misissuineq oqaloqatigiissutigineqarsimavoq inerniliussallu tusaatissatut tiguneqartut.
Tamatuma peqatigisaanik Naalakkersuisut Ilinniartitaanermut, Kultureqarnermut Ilageeqarnermullu Naalakkersuisoqarfimmut erseqqisaatigaat kukkunerit tassunga assingusut pisassanngitsut.
Sermitsiaq.AG eqqartuussissuserisup suliamik misissuineranik tamakkiisumik takunnissinnaatitaanermik qinnuteqarsimavoq, kisianni Siulittaasup Naalakkersuisoqarfianit allagaatinik takunnissinnaatitaaneq itigartitsissutigienqarpoq, misissuinerup suliamut ilisimasalinnik eqqartuussivilersuussinermi atugassanik imaluunniit eqqartuussivilersuussisoqarnissaanik isumaliutiginninnermi allaffigeqatigiinnerit ingerlanneqarsimanerata ataaniinnera tunngavilersuutigalugu.
Taarsiullugu Siulittaasup Naalakkersuisoqarfia paasissutissiivoq, misissuinerup immikkoortortai sorliit inunnut paasissutissat pillugit inatsit naapertorlugu tamanut saqqummiunneqarsinnaanersut naliliiffigineqassasoq.
SULIAQ TAMAAT ATUARUK:
Ilinniakkat taamaatiinnarneqartut
Læs hele sagen:
-
Uddannelser aflyses
-
Det må simpelthen ikke ske
-
Jeg er endt i en håbløs situation
-
Naalakkersuisut smadrer unges liv
-
Uddannelser blev syltet af departement
-
Studie-skandale skal have konsekvenser
-
Ilinniagarnissamut tunngatillugu kanngunartuliaq kinguneqartinneqartariaqarpoq
-
Sjusk og uacceptabelt
-
NI-mit neriuutigineqarpoq, bachelorinngorniarluni ilinniarfiit februaarimi aallartinneqassasut
-
NI håber på bachelor-uddannelser i februar