Atassut: Aamakku anguniakkagut

Naluneqanngitsutut partiip siulittaasua Knud Kristiansen siulittaasutut partiimiillu tunuarnermat, partii nuna tamakkerlugu immikkut ittumik ataatsimeersuarmat Siverth K. Heilmann Atassummi siulittaasutut qinerneqarpoq.

Maanna partiip siulittaasuata tulliata politikkikkullu oqaaseqartartuata, Qulutannguaq Berthelsenip, nutaamik siulittaasortaarnerup kingorna partiip anguniagai suunersut saqqummiuppai.

- Atassut isumaqarpoq Kalaallit Nunaanni partiinit ataasiakkaanit namminersulivinnissamik siunnerfeqalerneq akaareqatigiiffiusumik tamatsinnut ineriartortitseqatigiiffiussasoq. Namminiilivinnissaq akisussaassuseqarluartumik ornissagipput isumaqarpugut, tassaniipporlu inuiaqatigiinni suleqatigigiinnissarput sutigut tamatigut akileeqataaffissat nammassinnaassallutigit, Qulutannguaq Berthelsen erseqqissaavoq.

Aningaasarsiornikkut namminiilivinnissamut tunngatillugu apeqqummut, inuussutissarsiornermut sinaakkutinik pitsaanerpaanik pilersitsisoqarnissaat partiip kissaatigaa.

- Inuussutissarsiornermi tunngavissat pitsaasut pilersinneqarnerisigut, suliffeqarfiit imminut napatissinnaasut, suliffissanik ataavartunik pilersitsiffiusinnaasut, aningaasarsiorfiulluarsinnaasullu tunngavissinneqarluassammata. Atassut isumaqarpoq tamatumani nunatta pissarititai, uumassusillit uumaatsullu pinngortitallu immikkuullarissuunerani periarfissat tamarmik isiginiarneqarnissaai pingaaruteqartut, partiip siulittaasuata tullia oqarpoq.

Atuaruk: Knud Kristiansen Atassummit anivoq

Pingaarutilimmik aningaasarsiutaalersinnaasoq
Aatsitassarsiorneq kalaallit aningaasaqarneranni siunissami pingaarutilittut inissisimalersinnaasoq, Qulutannguaq Berthelsen oqarpoq:

- Tassanili Atassummit pingaartilluinnarparput inuussutissarsiutinut allanut innarliinnginnissaa aammalu mingutsitsinikkut aserorsaataannginnissaat.

Atuaruk: Politikkikkut naliliisartoq: Kristiansenip partii kiviartortoq qimappaa

Ilaqutaasunut aningaasanik tapersiinerit
Kræftimik eqqugaasut ilaqutaannut aningaasanik tapiissuteqartassasoq partii tamatuma saniatigut isumaqarpoq.

- Aningaasatigut annertoqqusiinissamut peqqutaatinneqarpoq nappaasuarmik kræftimik eqqugaagsoqaraagat, nunatta avataanut eqqugaasut ilaquttat qimallugit katsorsariartariaqartarnerat / nakorsartikkiartortariaqartarnerat, tamatumallu kingunerisarpaa ilaquttanik inooqatigisanik qimatsisariaqarnerit, uffa-massa napparsimanerup nalaani ilaquttanit tapersersorneqarluni ilagisaqarnissaq pingaartinneqartartoq.

- Ilaquttallu aningaasartuutaannik ikilileriniarnermi inuiaqatigiinnit aningaasaliinerunissaq Atassummiit pingaartipparput, taamaasilluta nunatsinni innuttaaqatitta toqqissisimasumik inuunerminni ingerlatsisinnaanissaat Atassummit aqqutissiuusseqataaffigissavarput, Qulutannguaq Berthelsen oqarpoq.