Atassut
Politikkikkut naliliisartoq: Kristiansenip partii kiviartortoq qimappaa
Atassut ingerlariaqqissaguni, partii nukittuumik aqutsisumik nassaartariaqarpoq, politikkikkut naliliisartoq Sten Lund oqarpoq
Sermitsiaq.AG-p marlunngornermi ullaakkut allaaserinninneratut, Atassutip siulittaasuata Knud Kristiansenip partii qimappaa.
- Atassummi siulersuisuunerit ilisimatippakka, siulittaasutut Atassummiillu tunuarlunga, taanna Facebookimi allappoq.
Knud Kristiansenip siulittaasuunermini partii kivissinnaasimanngilaa, politikkikkut naliliisartoq Sten Lund, Sermitsiaq.AG-mut taama oqarpoq.
Atuaruk: Knud Kristiansen Atassummit anivoq
Aqutsisoq sanngiitsoq
- Knud Kristiansen nukittuutut aqutsisuusimanngilaq. Politikkikkut oqallorinneq nukittuffigisimanngilaa, Atassullu aqunissaanut piginnaasaqarsimanani. Angallannermut kiffartuussinermut isumaqatigiissutit suliarineqarneranni tamanna ersarippoq, tamatumalu partii eqqorpaa, Sten Lund oqarpoq.
Knud Kristiansen 2014-imi siulittaasumik allamik toqqagassaqanngimmat, partiip siulittaasuattut toqqarneqarsimasoq, Sten Lund oqarpoq.
- Atassut piffissami sivisuumi kiviartornikuuvoq, Knud Kristiansenillu aaqqiivigisimanngilai. Toqqaannartumik oqaatigalugu partiimut iluaqutaasimanngilaq, politikkikkut naliliisartoq erseqqissaavoq.
Aallaavimmut ujartueqqinneq
Atassut kivinneqaqqissaguni partii aqutsisumik nukittuumik peqartariaqarpoq, Sten Lund naqissusiivoq.
- Partiip nukittuffigisani nassaareqqittariaqarpai, pilersinneqarnerani tamanna takuarput. Partiip tunngaviusumik naleqartitaanik ilisimasaqartumik Atassut aqutsisoqartariaqarpoq.
- Steen Lynge ukiorpassuarni partiimi ilaasortaanikuuvoq, partiimilu nuimasuuvoq. Taanna siulittaasutut qinigassanngortilluni imaluunniit partiip politikkianik nutarsaaqataalluni, partiip kivinneqarneranut peqataasariaqarpoq, Sten Lund oqarpoq.