Asii Kielsenip assuarliinera pillugu: Terlersorluni saassussineq

Illoqarfiit pingaarnersaanni inissianut 1600-nut, atuarfinnut, paaqqinnittarfinnut, sullorsuarmut inuussutissarsiortunut inissianut pilersaaruterujussuaq pillugu Kim Kielsenip ''plakatini takussasiani isumaannakkut pilersaarutaanerarlugu'' ullumi Sermitsiaq.AG-mut oqarpoq.

Aamma atuaruk: Kielsen Nuummi suliniut pillugu: Isumaannakkut pilersaarut

Kim Kielsenip assuarliinera Asii Chemnitz Narupimit tassuuguinnartumik sukannersumillu akineqarpoq:

- Siorarsiorfimmi suliniutip isumaannakkut pilersaarutaaneragaaneq akuerinngilluinnarpara. Ilisimalluinnarparali naalakkersuinikkut piumassuseqarnermik pisariaqartitsisoqassasoq. Pissusiviatigulli nunamut siulersuinermut ineriartortitsinermullu qaffasinnerpaamik inuup akisussaaffeqartup ilapittuuteqarniannginnera iluaqutaanngilaq. Taamaattorli ukiuni kingullerni Siumumit aqunneqarnerup nalaani ilisimalikkat tassaapput Sermersuup inerniliissutissanik nammineq pilersitsisariaqartoq, Naalakkersuisuniimmi tapersersuisoqanngilaq, Asii Chemnitz Narup, Sermitsiaq.AG-mut allappoq.

Aamma atuaruk: Nunatta oqaluttuarisaanerani inissianut pilersaarut annerpaaq

Kim Kielsenip parteeqatini kommunalbestyrelsimi Siorarsiorfimmik suliniummik tapersersuisimasunik pitsaagisaqannginnera, borgmesterip tupigusuutigaa.

Piffissalersuutaa ajortoq
- Siorarsiorfik tassaavoq suliniut angisooq aamma anguniagaqarfigisaq, kommunalbestyrelsimi ilaasortat 19-it tamarmik suleqatigiiffigisaat, suliniullu kommunalbestyrelsimi akerliuffigineqanngitsumik tapersersorneqarsimavoq – aammalu tassa Siumumit. Kim Kielsenip parteeqatiminik pitsaagisaqannginnera akuleriffigissanngilaq – piffissarli soorunami soqutiginartuuvoq. Aammami Sermersuumi borgmesteqannginnini Siumup artorsaatigisaraa ilisimaneqarluarpoq, taamaattumillu terlissorluni saassussiniarneq tamanna aamma naatsorsuussassaareerpoq. Suliniutip Siumup qineqqusaarinermut atortuutaaniinngilluinnartoq paasisinnaavara – tamatumunnga soorunami tunngavissaqarpoq, tamannalu tusaatissatut tiguara.

Atuaruk: Nunatta oqaluttuarisaanerani inissianut pilersaarut annerpaaq

- Illuatungaani Kalaallit Nunaata uniffigisaata, inissaaleqinerup alliartorfigisaata, isumaginninnermi ajornartorsiutit annertusiartorfigisaata, suliffeqartut piviusutut amerlassusaasa ikiliartorfigisaata, aammalu ilinniagaqareernermik kingornatigut inuusuttut ilinniarnerminnik naammassinnerlaat uteqqinnissaminnik kissaatigisaata, aammalu nutaanik innuttassatsinnik pissarsiffigisatsinnut naleqqiullugu amerlanerit nunamik qimatsisarfigisaata – aammalu naalakkersuinikkut inerniliissutinik pilersitsinerup, aamma nunarput innuttaasullu piviusunngortinneqarsinnaasunik siunissamut neriuuteqarnissamut tunniussinissap akornanni toqqagassaateqarpugut. Kim Kielsenip siulliit pineqartut aalluppai – Inuit Ataqatigiit kingulliit aallullugit, Asii Chemnitz Narup naqissusiivoq.

Ammasumik oqallinnissamut qaaqqusisoq
Illoqarfiit pingaarnersaanni borgmesterip Kalaallit Nunaata siunissaa pillugu Kim Kielsen ammasumik oqalliseqatiginissaanut qaaqquaa.

- Siuarsarneq aamma ineriartorneq qanoq qularnaassaneripput pillugu, Asii Chemnitz Narup naggasiivoq.