Angut tammaaneqartoq nammineq kajumissutsimik ikiuukkusuttunit ujarneqartoq

Amos Martin Jonassen kingullermik takuneqarmalli ullut aqqaneq-marluk qaangiussimalerput.

Nuummi kajumissutsiminnik ujaasisut angut 32-nik ukiulik Amos Martin Jonassen nassaariniarlugu ujaasinermik aallartitsipput. Amos Martin Jonassen pingasunngornermi 7. december kingullermik takuneqarpoq. Kajumissutsiminnik ujaasisut tallimanngorneq 16. december ujaasinertik aallartimmassulli najugaqarfiit eqqaat sumiiffiillu allat arlallit ujaasiffigineqareersimapput.

Rosa L. Lorentzen aamma Marie Kristine Jakobsen Middelfart Facebookimi eqimattamik ”Ammu Amos Martin nanisigu” aallartitsipput, eqimattarlu maanna 600-t missarluinnaanik ilaasortaqalereerpoq. Facebookimi quppernermi takuneqarsinnaapput sumiiffiit sorliit ujaasiffigineqarsinnaalereersut.

- Amos Martin nammineerlunga ilisarisimavara, aamma ilaqutaraara. Inummik tammaasaqarneq soorunami artornarpoq. Juullimulli ullut taama ikitsigilereersut suli oqimaannerusuusivoq. Kajumissutsimik ujaasinermik ataqatigiissaakkamik aallartitsinissamut siunertaavoq ilaqutariit akissutisinissaat immaqalu eqqissinissaat, Rosa L. Lorentzen Sermitsiaq.AG-mut oqaluttuarpoq.

Suli neriuuteqartut

Sumiiffiit arlallit ujaasiffigineqareersut taanna erseqqissaavoq. Amos Martin Jonassen kingullermik takuneqarami, pingasunngorneq 7. december talittarfimmi takuneqarsimavoq.

Rosa L. Lorentzen nassuiaavoq tammaaneqartup sumiissusersinissaa neriuutiginerpaallugu.

- Soorunami neriuutigaara nassaarineqassasoq, suliaq matuneqarniassammat. Aammali neriuutigaara ajunngitsoq nassaarineqassasoq. Susoqarsimanera paasisaqarfigissallugu aamma neriuutigaara, Rosa L. Lorentzen oqarpoq.

Angut maqaasineqarpoq: Innuttaasut quinut angallatinullu marseqquneqarput

Blok 16-imiit sanap tungaanut politiit ujaasisimapput. Pigaartuni aqutsisoq Bruno Brix ilisimatitsivoq Amos Martin Jonassen maanna ujarneqanngikkallartoq, politiit ujaasiffigisinnaasaat tamakkersimammata. Paasiniaanermi politiit maanna misissuipput angalatitsiviusinnaasut paasiniaaffigissallugit, qulakkeerniarlugu tammaaneqartoq Nuummiit aallarsimanersoq.

- Sumiissinnaaneranik maanna paasissutissaateqanngilagut. Neriuppungulli paasissutissanik nutaanik pissarsiumaarluta, nassaariniassagatsigu. Arlaat ilisimasaqassagaluarpoq, neriuppugullu uagutsinnut saaffiginnikkumaartut, Kalaallit Nunaata Politiivini pigaartut aqutsisuat Bruno Brix oqarpoq.

Kajumissutsiminnik ujaasisut amerlanerusariaqartut

Kajumissutsiminnik ujaasisut Nuummi illoqarfiup immikkoortortaani pingasuni sumi ujaasisimanerlutik politiinut aamma nalunaarutigisimavaat. Illoqarfiulli ilarujussua suli ujaasiffigineqanngilaq, kajumissutsiminnillu ujaaseqataasussat suli amigaatigineqarput.

- Nuuk illoqarferujussuuvoq. Najugaqarfippassuupput, sanaartorfiuvoq, umiatsialivippassuupput sumiiffiusinnaasullu allat amerlallutik. Kajumissutsiminnik ujaaseqataasinnaasunik suli pisariaqartitsivugut. Amerlanerugutta sumiiffiit tamakkerlugit ujaasilertorsinnaavugut, Rosa L. Lorentzen oqarpoq.

Rosa L. Lorentzenip, politiit assigalugit, ineqarfinni quit najugaqarfiillu eqqaat qinaasiffigeqquai. Sumilu ujaasisoqarsimaneranik facebookimi quppernermut nalunaaqqusilluni.

Tammaaneqartoq ima isikkoqarpoq:

• Angut
• 32-nik ukiulik
• 165 cm missaani angissusilik
• Tuattoq
• Aappaluttumik teqqialimmik nasalik, qernertunik sullisilik, kamippai qasertut qaqortunik titarnillit Salomonit

Politiit 70 14 48-mut attaveqarfigineqarsinnaapput.

Nutaarsiassat

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...