assit takukkit
'Amerlasuut suli isumaqarput piusip amia inerteqqutaasoq'
KNAPK soqutigisaqaqatigiiffiit allat peqatigalugit aamma politikerit ullumi Europa-parlamentip saavani malunnartitsipput
Politikerit arlaqartut, atorfillit aamma soqutigisaqaqatigiiffiit Bruxellesimi Europa-parlamentip saavani EU-p pusinit tunisassianik eqqusseqqusiunnaarnera oqallillutik oqalugiarlutillu ullumi naapissutigaat.
Inuit Ataqatigiit folketingimut ilaasortaatitaat Aaja Chemnitz Larsen tassani oqalugiarluni peqataavoq, EU-mut inassutigaa EU Kommissionip puisunut peqqussutip malittarisassiissutaanut peqqussummut naammassinnissasoq.
Atuaruk: Great Greenlandimi sipaarniartoqalersoq
- Oqalugiaatinni EU Kommissionip suliassanik maanna kivitsinissaata pisussaaffigisaminut pingaassusaa ersarissarpara. EU-p paasititsiniaanikkut aamma puisip amiinik nunatsinneersunik pisineq inerteqqutaanngitsoq oqariartuutigalugu siammarterinikkut suliaq kivissavaa, Aaja Chemnitz Larsen tusagassiuutinut nalunaarummi oqaaseqarpoq.
Paasinerliornerit akisuut
- Inatsimmut nutaamut naammassinninniaraanni, Europami pisisartut puisit amiinik eqqusseqqusinnginnermi naggueqatigiit inuit pineqannginnerat ilisimatinnissaa pingaaruteqarluinnarpoq. Ajoraluartumik amerlaqisut isumaqarput, puisip amiinik Kalaallit Nunaanneersunik pisineq inerteqqutaasoq, tamannalu uagutsinnut annertuumik aningaasatigut eqquinerlunnermik kinguneqarsimavoq, Aaja Chemnitz Larsen oqarpoq.
Puisit amiinik paasititsiniaanermik suliaq Inuit Sila naapertorlugu, aningaasatigut kingunerlutsitsineq 353 millionit koruunit tungaanut naleqarpoq, avammut tunisassiornissaraluit nalingi.
Video: Atisaliortartup puisinniartarneq soqutigisarileraa
Puisinut tunngatillugu peqqussummik aaqqiinermi EU Kommissioni naggueqatigiit inuit puisip amiinik tunisassiorsinnaatitaanerat qaammarsaavigissagaa suliakkerneqassaa, puisip amiinik tunisassiornerup annertuseqqinnissaa neriuutigalugu.
Maannakkumut Kommissioni taamaallaat nittartakkamut paasissutissartalimmut tikkuussiinnarnikuuvoq, tamannalu isornartorsiorneqarpoq.